Thuajse të gjithë janë të sigurt se po të mos ishin milionat që përfiton, Kristiano Ronaldo nuk do të kishte shkuar të luante kurrë në kampionatin e Arabisë Saudite.
Por vetë ylli portugez, duke folur nga grumbullimi i përfaqësueses së tij para sfidës në kualifikimet e Euro 2024 ndaj Lihtenshtejnit, ka mbrojtur me forcë aktivitetin në të cilin aktivizohet që nga janari i këtij viti.
“Ndjehem mjaft mirë. Po të mos ishte kështu, nuk do të isha këtu. Jam në një kampionat shumë konkurrues, duhet parë kampionati i Arabisë Saudite në një mënyrë tjetër.
Qartësisht, nuk është si Premier Liga, do të gënjeja nëse do e thosha një gjë të tillë, por është konkurrues. Më ka çuditur në mënyrë pozitive. Ka skuadra të mira, është i ekuilibruar, lojtarët arabë janë të aftë, të huajt i japin më shumë cilësi. Ndoshta do të bëhet, brenda 5 apo 6 vitesh, kampionati i 4-t apo i 5-të në botë”, theksoi ylli portugez, i cili ndonëse pranoi se kishte menduar tërheqjen nga kombëtarja e vendit të tij, kishte vendosur në fund që të vazhdonte.
“Roli im në kombëtare, në 10-15 vitet e fundit, ka qenë gjithmonë i njëjti. Nëse më duan, do të jem gjithmonë këtu. Motivimi im është i pandryshueshëm, vit pas viti, është njëlloj sikur të ishte hera e parë. Unë dashuroj të luaj me ekipin kombëtar. Kanë kaluar 10 vite dhe të jem këtu nuk është e thjeshtë, ndaj jam shumë i lumtur. Nëse ekipi kombëtar më cilëson si një aset, do të bëj gjithmonë më të mirën time për të ngjitur Portugalinë në nivelet më të larta, bashkë me shokët e mi të skuadrës. Kjo është shtëpia ime”, theksoi Ronaldo para mediave.
Discussion about this post