Edhe pak ditë na ndajnë nga gjysmëfinalja e Eurovisionit, ku Shqipëria do të përfaqësohet nga Ronela Hajati. Në turneun që po zhvillon në vende të ndryshme si përfaqësuese në Eurovizion, këngëtarja ka ngjallur shumë reagime për veshjen e saj, por edhe për situata të ndryshme dhe reagimet e saj. Së fundmi, Ronela ka folur për foton e publikuar pak ditë më parë, ku u shfaq duke qarë. Ajo e ka konsideruar si një moment dobësie, pasi ka momente që ndihet vetëm.
“Jemi njerëz të gjithë, sido që shfaqemi në kamera. Edhe burrat më fortë kanë momentet e dobëta, jo më unë, që kam momente që ndihem vetëm, është personale gjëja, nuk ka si shëndeti, vjen para të gjithave. Jam vajzë e fortë, i them vetes do të rregullohen të gjitha. Profesioni ynë është më i gjykuari, pavarësisht se i bëj këngët për njerëzit që t’i pëlqejnë, ndryshe ne nuk do të ekzistonim”, tha Ronela në një intervistë televizive.
Më tej, e përlotur, Hajati foli edhe për babain e saj të ndjerë. “Unë shkoj në varreza, i lutem atij njësoj si zotit, mundohet shumë. Gjithmonë njerëzit që mundohen shumë, një ditë i del për mirë”, u shpreh këngëtarja. Ndërsa siguroi fansat se gjithçka është në rregull dhe ajo është shumë gati për në Eurovizion.
Discussion about this post