Wayne Rooney “shkarkon” Cristiano Ronaldon. Në një intervistë ekskluzive për talkSPORT, Rooney shpjegoi se sjellja e ish-shokut të tij të skuadrës ishte e papranueshme dhe beson se kampioni portugez, pas Botërorit, mund të jetë më shumë një barrë sesa pasuri për “Djajtë e Kuq”.
E PAPRANUESHME
Rooney nuk është i impresionuar nga sjellja e fundit e Ronaldos dhe beson se pesë herë fituesi i “Topit të Artë” duhet të tërhiqet dhe të pranojë vendimet e Ten Hag: “Nuk mendoj se Manchester United është më i fortë me të në fushë.
Le të jemi të qartë, Cristiano Ronaldo është një nga lojtarët më të fortë të të gjitha kohërave dhe së bashku me Leo Messin, më të mirët e brezit të tyre, por sjellja që ka pasur nga fillimi i sezonit është e papranueshme. Me këtë qëndrim ai rrezikon ta shpërqendrojë skuadrën, gjë që Manchester United nuk ka nevojë për momentin.
Ten Hag është duke u përpjekur ta rindërtojë skuadrën. Nëse qëndron, duhet të ulë kokën, të punojë dhe të jetë gati nëse dhe kur ka nevojë trajneri. Nëse ndodh kjo, do të jetë një pasuri. Nëse nuk ndodh, do të bëhet një barrë e padëshiruar”.
TEN HAG
Rooney mbështeti Ten Hag dhe menaxhimin e tij të grupit si nga pikëpamja teknike, ashtu edhe karizmatike: “Të jem i sinqertë, nuk e kam takuar atë, por mendoj se po bën shumë mirë. Më thanë se lojtarët dhe stafi janë shumë më të lumtur se sa kanë qenë në dy vitet e fundit.
Nuk është rastësi që për herë të parë në dy ose tri vite, tani kam filluar të shoh një identitet të lojës. Trajneri holandez gjithashtu ka treguar forcë dhe karakter në trajtimin e çështjes së Ronaldos, kështu që është njeriu i duhur për rindërtimin e Manchester United. Mendoj se do të marrë pak kohë, por është hapi i parë për t’u rikthyer në top katërshe dhe Ligën e Kampionëve”.
Discussion about this post