Në dëshminë e tij para Komisionit Hetimor për Shërbimet Publike të Sterilizimit dhe të Check-up në Shëndetësi, biznesmeni Ilir Rrapaj ka mohuar që të ketë pasur raporte miqësore me ish-zëvendësministrin e Shëndetësisë, Klodian Rjepaj.
Rrapaj është shprehur se tani mund të thotë se e njeh ish-zv.ministrin pasi shton se ndajnë të njëjtën rezidencë (referuar burgut) prej 15 muajsh.
Në lidhje me koncensionin e “Sterilizimit”, Rrapaj ka theksuar se është vendosur në dijeni nëpërmjet njërit prej ortakëve që në bashkëpunim me të tjerët kishin vendosur që të tentonin të merrnin pjesë në garë.
Kryetarja e komisionit, Albana Vokshi: A e njihni shtetasin Klodian Rrjepaj?
Ilir Rrapaj: Për shtetasin Klodian Rrjepaj, do më lejoni ta ndaj në 2 faza dëshminë time. Për Klodian Rrjepaj, deri para 1 viti, kisha dijeni se çfarë ishte dhe kush ishte, pra në momentin e arrestimit. Kam tashmë 15 muaj që ndaj të njëjtën rezidencë, tani edhe mund të them se e njoh.
Albana Vokshi: A ishit miq apo jo?
Ilir Rrapaj: Fjala mik ka një përkufizim të veçantë në konturet e shqiptarizmit, të kesh mik është një gjë e rrallë. Kam fatkeqësisht bindjen dhe të dëshmuar se ky term është më i abuzuari me dashje apo padashje. Nuk kam asnjëlloj miqësie apo njohje, ashtu sikurse ju thashë, udhëtimi im formativ e shkollor dhe akademik, është i largët nga udhëtimi i zotërisë.
Albana Vokshi: Nuk e njihni nga afër?
Ilir Rrapaj: Jo, nuk e njoh. Nuk e kam njohur në atë periudhë. Vinte nga një fakultet tjetër. E kam takuar pas 20 vjetësh.
Albana Vokshi: Kur u njohët?
Ilir Rrapaj: E kam takuar për herë të parë zyrtarisht në momentin e një aktiviteti të zhvilluar nga qeveria shqiptare. E kam takuar nga afër dhe që kemi shkëmbyer kredincialet në një aktivitet publik tek Pallati i Kongreseve.
Albana Vokshi: Në cilin vit?
Ilir Rrapaj: Diku nga 2013-2014, pas zgjedhjeve parlamentare, është bërë një aktivitet ku nëpërmjet disa personave e kam takuar.
Albana Vokshi: Për çfarë keni folur?
Ilir Rrapaj: Kam folur duke filluar me komplimentat që i kam bërë zotërisë për karrierën, i kam thënë “komplimente për karrierën dhe për vendin sfidues në kohë të vështira”.
Albana Vokshi: A keni folur për koncensionin e sterilizimit?
Ilir Rrapaj: Jo, absolutisht jo.
Albana Vokshi: Si u vutë në dijeni për koncensionin e sterilizimit?
Ilir Rrapaj: Jam vendosur në dijeni nëpërmjet njërit prej ortakëve që në bashkëpunim me ortakët e tjerë kishin vendosur që të tentonin të merrnin pjesë në garë.
Biznesmeni, tashmë pas hekurave në masë sigurie “arrest në burg” për dosjen e “Sterilizimit”, mohoi dhe njohjet me ministrin e Shëndetësisë të asaj kohe Ilir Beqaj dhe Kryeministrin Edi Rama.
Albana Vokshi: A e njihnit shtetasin Ilir Beqaj?
Ilir Rrapaj: Kam njohje kush ishte si personazh publik.
Albana Vokshi: Nuk kishit miqësi më parë?
Ilir Rrapaj: Absolutisht jo, as më gjatë, as më vonë!
Albana Vokshi: E njihni vetëm nga larg si ministër?
Ilir Rrapaj: Patjetër!
Albana Vokshi: Kur e keni takuar për herë të parë?
Ilir Rrapaj: Besoj se ka qenë në të njëjtin aktivitet të thirrur nga qeveria shqiptare nëse nuk gabohem. Një përshëndetje.
Albana Vokshi: Aty jeni takuar edhe me ministrin?
Ilir Rrapaj: Aty kam patur rastin fizikisht që ta njoh.
Albana Vokshi: Nuk keni biseduar aty?
Ilir Rrapaj: Jo zonjë, ishim mbi 400 pjesëmarrës, të gjithëve thjesht u ishte rezervuar një përshëndetje.
Albana Vokshi: Po thoni që nuk kishit miqësi me minsitrin dhe kur ka pësuar aksident dhe është dërguar në një spital në Itali nuk keni qenë ju që e keni ndihmuar ministrin?
Ilir Rrapaj: Jo zonjë. Më vjen keq që nuk kam qenë.
Albana Vokshi: Ministri e ka pranuar vetë që ka qenë i aksidentuar dhe që ka vajtur në një prej spitaleve në Bari.
Ilir Rrapaj: Unë nuk njoh njerëz nëpërmjet spitaleve zonjë!
Albana Vokshi: A ke dijeni për një vilë që la blerë Beqaj në Itali menjëherë pas koncesionit?
Ilir Rrapaj: Jo jo!
Albana Vokshi: E njihni shtetasin Edi Rama?
Ilir Rrapaj: E njoh si gjithë shumica e shqiptarëve, nëpërmjet aktivitetit politik që zhvillon.
Albana Vokshi: Si e keni njohur?
Ilir Rrapaj: Në të njëjtin aktivitet, e kryesonte kryeministri dhe aty nëse konsiderohet njohje. Ky është momenti i parë.
Albana Vokshi nxjerr fotografinë e Edi Ramës dhe Ilir Rrapajn
Albana Vokshi: Nuk keni pasur diskutime të tjera?
Ilir Rrapaj: Jo!
Albana Vokshi: Pas kësaj keni patur takme me Kryeministrin?
Ilir Rrapaj: Nëse nuk gaboj 1 ose 2 raste të tjera në delegacionin me rajonin e Umbrias.
Albana Vokshi: Për çfarë keni biseduar me Kryeministrin?
Ilir Rrapaj: Nuk kam biseduar. Thjesht kam qenë i pranishëm në bisedat që kanë bërë delegacionet.
Albana Vokshi: Për çfarë u diskutua?
Ilir Rrapaj: Nuk pretenoj të mbaj mend të gjitha artikujt e akordit të bërë. Nëse është një tullë e vogël e vendosur në raportet mes Italisë dhe Shqipërisë, besoj që mund të ndihmen krenar në këtë aspekt.
Albana Vokshi: Pas këtij takimi, kush ka qenë marrëdhënia juaj me ministrin e asaj kohe Ilir Beqaj? Keni patur takime të tjera zyrtare apo jo zyrtare?
Ilir Rrapaj: Kanë qenë 1 ose 2 në mos gaboj takime të gjitha në funksion dhe të mbuluara nga rrjedhojat që lindën nga akordi kuadër. Dhe vetëm institucionale.
Prokuroria gjeti lidhje miqësore mes Rrapajt dhe ish-zëvendësministrit të Shëndetësisë në atë kohë, Klodian Rjepaj, i arrestuar si dhe udhëtime dhe kontakte me ish-ministrin e Shëndetësisë, Ilir Beqaj (i arrestuar për shpërdorim të fondeve të SASPAC dhe nën hetim me masë “detyrim paraqitje” për “Sterilizimin”). Për hetuesit, ata duhet të kishin shmangur veten nga procedurat e koncensionit të “Sterilizimit”, por nuk e kanë bërë duke favorizuar biznesmenin. Nën hetim për këtë dosje janë gjithashtu edhe 6 ish-zyrtarë të tjerë.
Discussion about this post