Pavlin Polia drejtues i bujtinës “Polia” në Theth, u shpreh me keqardhje për jetët e humbura, pasi makina ku ata po udhëtonin u rrëmbye nga uji në zonën e Bogës, pranë Përroit të Thatë në Malësinë e Madhe.
Polia tregoi se situata sot në qytet ishte e qetë, por rrethinat mbeten ende nën pushtetin e ujit.
“Sot moti është përmirësuar, pasi për momentin nuk ka reshje, megjithatë situata vijon të mbetet e rënduar për shkak të reshjeve të shumta që ranë ditën e djeshme. Nga Shkodra për në drejtim të Tiranës nuk udhëtohet dot ende pasi ura e Bahçallëkut vijon të mbetet e bllokuar”, tha ai për “Dritare.net”
“Në qytet nuk ka përmbytje, duke e krahasuar me vitin 2011 këtë herë më tepër u godit zona e nën Shkodrës, jo qyteti. Sa i takon humbjes së dy personave ditën e djeshme në rrugën Theth-Shkodër, duhet përmendur se shkak ishte edhe dalja e ujit në rrugë, duke e dëmtuar aksin. Kjo tragjedi që ndodhi duhet të jetë mësim për mirëmbajtjen e rrugës dhe për të mos neglizhuar infrastrukturën e zonës.
Pjetër Rushaj, i cili humbi jetën së bashku me djalin e tij ishte një mik, një biznesmen i zonës dhe një njeri shumë punëtor. Ka pasur disa ndërhyrje, por këto fatkeqësi natyrore nuk duhet të ndodhin çdo ditë, si herën e parë. Zonat e rrethinave janë ato që kanë pasur edhe shkëputje të energjisë elektrike”,u shpreh Polia
https://www.youtube.com/watch?v=ZJ2JSrn-XCg
Discussion about this post