Sipas legjislacionit të miratuar sot në Dhomën e Ulët, në Bundestag, numri i pacientëve me COVID-19 në spitale do të jetë treguesi kryesor për vlerësimin e ashpërsisë së pandemisë në Gjermani.
Ndërsa më përpara, referuese ishin shifrat e infeksionit, të cilat nuk konsiderohen më aq kuptimplotë, për shkak të numrit të shumtë të personave të vaksinuar. Numri i pacientëve me COVID-19 për 100 000 banorë gjatë shtatë ditëve të fundit në Gjermani është aktualisht në 1,69, sipas institutit të kontrollit të sëmundjes RKI.
Të hënën, shifra ishte 1,64. Në nivelin më të lartë, rreth Krishtlindjes së vitit të kaluar, kjo shifër ishte në 15,5. Gjithashtu, do të merren parasysh edhe treguesit e tjerë, si numri i infeksioneve të reja për 100 000 banorë në shtatë ditë, kapaciteti i disponueshëm i kujdesit intensiv dhe numri i personave të vaksinuar.
Deri më tani, 61,4 % e popullsisë në Gjermani është plotësisht e vaksinuar. Legjislacioni i ri u jep 16 landeve gjermane aftësinë për të përcaktuar se në cilën pikë të vendosin kufizime të gjera.
Dhoma e Sipërme, Bundesrat, ende nuk e ka miratuar rregulloren e re dhe do të mbajë një seancë të veçantë të premten.
