Një grua është rrahur brutalisht nga bashkëshorti i saj, i cili dyshonte se partnerja e tradhëtonte. Ngjarja ka ndodhur në një familje në Graçanicë të Kosovës.
Burimet nga Prokuroria bëjnë të ditur se rasti ka ndodhur në fund të muajit qershor, por detajet tronditëse janë zbuluar së fundmi, pasi gruaja e cila është viktimë e këtij rasti ka rrëfyer dhunën që e ka përjetuar nga burri i saj, në shtëpinë e tyre.
Sinjali mëson se i dyshuari T.B., fillimisht ka pasur një konflikt verbal me gruan, të cilën e ka akuzuar për tradhti, e më pas të njëjtës ia ka lidhur duart e këmbët dhe e ka sulmuar fizikisht me një kabllo. Për të mos mbaruar me kaq, ai ka shkuar edhe më tej, me veprime të tmerrshme.
Sipas informacioneve që ka Sinjali, viktima ka deklaruar se burri i saj ka ndezur një zjarr, me qëllimin që t’i djegë organin gjenital, ku për pasojë i ka shkaktuar plagë në trup.
Përballë kësaj situate, gruaja fillimisht ka marrë trajtim mjekësor në spital, si pasojë e djegieve që pësoi, ndërsa gjatë ditës së djeshme është marrë në pyetje nga prokuroria lidhur me ngjarjen.
“Është arrestuar i dyshuari mashkull kosovar pasi i njëjti, nën ndikim të alkoolit ka sulmuar bashkëshorten e tij viktimën femër kosovare. Viktima ka pranuar trajtim mjekësor ndërsa i dyshuari me vendim të prokurorit është arrestuar”, njoftoi policia.
Discussion about this post