Rrëmujë në universitetet e rretheve, studentët thonë se do braktisin shkollën
Studentët në të gjithë vendin ditën e sotme nisin mësimin në auditore. Por, në fakultetet e rretheve është krijuar kaos dhe studentët nuk arrijnë të kenë një orientim se çfarë do të ndodh ditën e sotme. Disa studentë paralajmërojnë se do të zhvillojnë protesta në lidhje me kushtin e vendosur për t’u paraqitur në auditor, i cili është ai i vaksinimit.
Studentë të rinj të vitit të parë bachelor në Durës, janë ende të paqartë sesi do të veprohet për këtë vit akademik, pasi shumica prej tyre sot janë paraqitur pa test PCR apo certifikatë vaksinimi.
Të shumë kanë qenë ata të cilët kanë deklaruar se nëse nuk do të lejohen në auditore të pavaksinuar, do të lënë shkollën.”
“Me shumë emocione por do e marr me sportivitet. Nuk e kam bërë vaksinën, absolutisht nuk do e bëja. Nuk do jem dakord të bëj as testin. Po qe kështu do e lë shkollën fare. Do gjej një rrugëzgjidhje por vaksinën nuk do e bëj” – është shprehur një student nga fakulteti i Durrësit.
“Nuk dua të bëj as vaksinën as testin, shumica nga ne nuk e përballojmë dot, mund edhe të lë vitin shkollor por vaksinën nuk do e bëjmë. Ne jemi ngritur edhe në protestë por prapë nuk kishte ndonjë ndryshim” – thotë një tjetër studentë.
Një situatë kaotike paraqitet edhe në Universitetin e Shkodrës, ku numri i studentëve të vaksinuar është shumë i ulët dhe nuk dihet sesi do të procedohet më tej për këtë qark.
E njëjta situatë paraqitet edhe në Universitetin “Fan Noli” në Korçë,ku nga 3.500 studentë që ka në përbërje ky fakultet, deri më tani, një pjesë shumë e vogël e tyre kanë aplikuar vaksinën.
Një student tha se pjesa më e madhe e shokëve nuk kanë marrë të paktën asnjë dozë, ndërsa shtoi se janë në pritje të ndryshimit të vendimit për të zhvilluar mësimin në auditorë
“Jo nuk jam vaksinuar. Asnjë se ka bërë vaksinën, as ne nuk e bëjmë. Sot është dita e parë dhe s’kemi bërë tampon, nesër do e bëjmë. Nuk e dimë si do të funksionojë këtë ditë, s’na kanë thënë gjë. Nëse të tjerët nuk hyn në auditorë as ne nuk futemi. Një pjesë e shoqërisë sime është vaksinuar, por pjesa më e madhe nuk është vaksinuar”, tha studenti.
