Gati 6.500 foshnja kanë lindur në Turqinë jugore pas dy tërmete që tronditën rajonin në fillim të këtij muaji. Lajmin e ka dhënë ministri turk i Shëndetësisë, Fahrettin Koca.
“Gjithsej 6.447 foshnja kanë lindur në rajonin e prekur nga tërmetet që nga dita e parë e fatkeqësisë. Çdo fëmijë i lindur është shpresë,”- tha Koca në Qendrën Koordinuese të Agjencisë së Menaxhimit të Fatkeqësive dhe Emergjencave të Turqisë (AFAD) në Hatay.
Koca tha se shërbimet e nevojshme shëndetësore u ofrohen foshnjave dhe nënave të tyre pa ndërprerje, por jo vetëm atyre por edhe të lënduarve të tjerë.
“Mbi 51.150 pacientë dhe të plagosur u transferuan nga zona e tërmetit në spitalet e qyteteve të tjera,”- tha Koca.
Po ashtu, ai tha se në zonën e fatkeqësisë janë ngritur gjithsej 114 njësi emergjente dhe 25 spitale të lëvizshme. Numri i të vdekurve nga tërmetet shkatërruese është rritur në 40.642.
Discussion about this post