Rrezikoheshin të mbyteshin në det, shpëtohen dy turiste kroate në Velipojë

Dy turiste kroate janë shpëtuar nga Policia e Shkodrës, pasi rrezikonin mbytjen në det. Ngjarja ka ndodhur mbrëmjen e së hënës, teksa turistet lundronin me lundër në det.

Sipas policisë, ka qenë një shtetas francez, i cili ka dalë me not në breg të detit në Pulaj, (plazh i Velipojës) dhe ka kërkuar ndihmë për dy turistet nga Kroacia.

Ata po lundronin me mjetin e tyre dhe si pasojë e dallgëve të shumta mjeti ka hyrë në thellësi dhe për këtë shkak u rrezikohej seriozisht jeta.

Shërbimet e Policisë në bashkëpunim me Postën Kufitare Velipojë dhe me ndihmën e Policisë Malazeze të cilët ndërhynë menjëherë me helikopter dhe një mjet lundrues, bënë të mundur nxjerrjen nga deti me një mjet lundrues të Policisë malazeze të dy turisteve kroate, të cilat po dërgohen për ndihmë mjekësore në Ulqin, jashtë rrezikut për jetën.