Ditën e djeshme u raportua se Bashkimi Evropian është duke bërë gati një paketë sanksionesh për Kosovën pas tensioneve në veri të vendit dhe që kryeministri i Kosovës, Albin Kurti nuk ka marrë hapat e duhur në favor të shtensionimit të situatës.
Në anën tjetër, zëdhënësi i BE-së, Peter Stano tha se vendet anëtare të Bashkimit Evropian tashmë e kanë në tryezë planin për sanksione ndaj Kosovës.
Kështu, Kosova rrezikon të futet në hartën e vendeve të cilat janë sanksionuar nga Bashkimi Evropian, një hartë e përbërë në shumicë nga vende jo-mike të Bashkimit Evropian dhe të identifikuara me sjellje jo-demokratike.
Në këtë listë, përveç Rusisë e cila është e sanksionuar nga Bashkimi Evropian për shkak të agresionit dhe pushtimit të saj mbi shtetin e pavarur të Ukrainës gjendet edhe Bellorusia për shkak të përkrahjes që i ka dhënë Rusisë në këtë nismë.
Në listë është edhe Afganistani, më saktësisht, talibanët ndaj të cilëve Bashkimi Evropian i ka vendosur sanksione. Ndër shtetet e tjera janë Burundi, Kina, Afrika Qëndrore, Korea e Veriut, Republika e Kongos, Guinea, Haiti, Irani, Iraku, Libani, Libia etj.
Në këtë listë përfshihen edhe sanksionet të cilat janë adoptuar nga Kombet e Bashkuara dhe sigurisht janë mbështetur nga Bashkimi Evropian dhe Kosova së paku sipas raportimeve rrezikon të bëhet pjesë e kësaj liste.
Një vërejtje alarmuese e ka dhënë të martën edhe kryeministri i Shqipërisë, Edi Rama i cili u shpreh se Kosova rrezikon të përballet me një pako të sanksioneve nga ndërkombëtarët.
Discussion about this post