Komiteti Teknik i Ekspertëve do të mblidhet ditën e sotme, pas përhapjes së variantit të ri të Covid-19, Omicron, që po shqetëson botën dhe ka bërë që shumë shtete të ashpërsojnë masat.
Pas më shumë se një muaji, komiteti do të mblidhet sërish sot, për të bërë një analizë të situatës me Covid dhe për të vendosur nëse do të ketë shtrëngim masash.
Mbledhja e fundit e Komitetit u zhvillua më 22 tetor, ku u vendos vaksinimi me dozë të tretë për personat mbi 60 vjeç, vaksinimi i fëmijëve mbi 16 vjeç dhe i atyre mbi 12 vjeç me sëmundje kronike.
Ndërsa aktualisht, masat në fuqi janë ora policore nga 23:00-06:00, qytetarët që hyjnë në vend duhet të jenë pajisur me certifikatë vaksinimi, të kenë testin PCR negativ brenda 72 orëve ose të kenë provë të kalimit të infeksionit Sars-Cov2, të vlefshme deri në 6 muaj pas shërimit.
Këto rregulla janë të vlefshme edhe për ata qytetarë të cilët kalojnë tranzit në Shqipëri. Fëmijët deri në 6 vjeç nuk i nënshtrohen këtyre rregullave.
Gjithashtu, vazhdon të mbetet në fuqi urdhri për përdorimin e maskave në ambientet e mbyllura, në qendra tregtare, supermarket, dyqane, transport publik dhe në të gjitha ato vende ku nuk sigurohet distancimi fizik. Ndërsa, nuk lejohet grumbullimi i më shumë se 50 personave.
Discussion about this post