Stina e verës ka sjellë përveç temperaturave të larta edhe rastet nga pickimet e zvarranikëve dhe insekteve. Vetëm gjatë javës së fundit në spitalin Rajonal në Fier janë paraqitur 10 raste, 4 persona janë pickuar nga merimanga e zezë dhe 6 prej zvarranikëve (gjarpër dhe nepërka).
Sipas mjekut toksikolog Lulëzim Banushaj, në spitalin Rajonal Fier, rastet në fjalë kanë ardhur nga zonat e Cakranit, Mallakastra, Roskovecit ku fermerët në këtë periudhë janë të ekspozuar për shkak të punëve në bujqësi.
Sipas bluzave të bardha të gjithë personat e pickuar nga merimanga dhe zvarranikët i kanë shpëtuar rrezikut nga vdekja.
Mjeku toksikolog ka shpjeguar se në këtë periudhë helmi i zvarranikëve dhe insekteve është shumë i koncentruar dhe viktimat e tyre janë të rrezikuar.
Banushaj: Fatkeqësisht janë shtuar rastet me pickime nga insekte të ndryshme, duke filluar nga merimangat, akrepat dhe helmimet nga gjarpërinjtë. Kemi pasur raste që kanë rrezikuar dhe jetën e të sëmurit. Deri tani ka pasur 10 raste, më tepër kanë dominuar zvarranikët.
Kanë qenë në gjendje të rëndë. Duhet marrë masat mbrojtëse, përdorimi i çizmeve, doreza, nuk duhen anashkaluar. Janë shtuar rastet, për shkak të mungesës së pesticideve, insektet dhe zvarranikët janë bërë më helmues. Zonat më të rrezikshme, janë ato kodrinoret.
Discussion about this post