Policia e Shkodrës vijon bashkëpunimin e saj me Kosovën dhe Malin e Zi, sa i përket avionit që pësoi avari të hënën në Kelmend.
Burime të Gijotina.com bëjnë me dije se janë shoqëruar për t’u marrë në pyetje të paktën 10 persona, të cilët janë kryesisht banorë të zonës së Vermoshit.
Policia ka informacion që ky avion i paçertifikuar është montuar pjesë-pjesë në Shqipëri, ndërsa personat e shoqëruar janë qytetarë që merren me punë të ndryshme artizanale në zonën e Vermoshit dhe përreth saj të cilët mund të kenë informacion për këtë mjet fluturues.
Pavarësisht kësaj, ende nuk ka asnjë provë konkrete që përfshin ndonjërin prej tyre të paktën deri tani.
Ndërkohë, burime nga grupi hetimor thonë se ka dyshime të forta se avioni i modifikuar, pa flamur, numër dhe certifikim, të ketë qenë në fazë testuese, duke mos u përjashtuar mundësia e përdorimit të tij për trafikim të narkotikëve. Të vetmet prova që mund të ndihmojnë hetuesit, janë shenjat e gishtërinjve që piloti dhe pasagjeri të kenë lënë në mjet, pasi asnjë provë materiale nuk është gjetur në vendngjarje.
Sipas Policisë, për këtë fluturim nuk ka pasur dijeni as kulla ajrore duke provuar në këtë mënyrë se avioni kishte bërë ngritje të paligjshme. Mendohet se anëtarët e bordit kanë qenë në kontakt të vazhdueshëm gjatë kohës që fluturonin mes kufirit shqiptaro-malazez, me persona që i kanë ndihmuar të largohen në drejtim të paditur pas incidentit.
Burimet e Gijotina.com thanë se persona të cilët kanë qenë në avion, si piloti dhe pasagjeri mund të jenë largur drejt Malit të Zi, si pika më e afërt e vendit ku është rrëzuar edhe avioni.
Duke qenë se akoma nuk kemi një identifikim të këtyre dy personave, të cilët akoma janë misterioz të shtojnë akoma më shumë dyshime se dy personat mund të kenë kryer këtë udhëtim për kultivimin e lëndëve narkotike.
Në zonën e Vermoshit dhe kryesisht zonat malore të qytetit të zonës, pikërisht tani është koha e kultivimit të lëndëve narkotike. Po pikërisht në këtë periudhë një vit më parë u shënua edhe ngjarja e rëndë në Vrith, të Malësisë së Madhe , ku mbetën të vrarë dy kushërinj për shkak të parcelave me kanabis.
Kujtojmë se një javë më parë, në Vermosh është arrestuar nga policia edhe një shtetas për kultivimin e lëndëve narkotike. Kjo të shton më shumë dyshimet e këtij udhëtimi misterioz të dy personave akoma të paidentifikuar prej Policisë së Shtetit dhe bluve të Shkodrës.
