KINË-Bastisjet në Sindiang filluan pak pas mesnatës. Qindra policë me pushkë automatike u futën derë më derë në komunitetin e ujgurëve në pjesën perëndimore të Kinës, duke i nxjerrë nga shtëpitë, prangosur dhe futur kokën nëpër thasë, duke i kërcënuar me vrasje nëse rezistojnë, kështu fillon rrëfimin e tij ish-detektivi i policisë kineze.
“Të gjithë me dhunë i merrnim gjatë natës, nganjëherë qindra njerëz brenda një nate”, tha ish-detektivi i cili kërkoi të identifikohej vetëm si Jiang, për të mbrojtur anëtarët e familjes së tij që mbeten në Kinë.
Gjatë një interviste për CNN, që u realizua në Evropë ku edhe aktualisht gjendet në azil, Jiang zbuloi detaje të rralla të asaj që e ka përshkruar si fushatë sistematike e torturimit mbi ujgurët, duke i dërguar në llogoret më famëkeqe, derisa Pekini zyrtar vazhdimisht ka mohuar këto pretendime.
“Godisni nëpër këmbë, rrihni derisa të mavijosen dhe fryhen. Deri të gjunjëzohen në dysheme dhe të fillojnë të qajnë”, ka thënë Jiang.
Ai pranoi se çdo i burgosur i ri është rrahur gjatë marrjes në pyetje, përfshirë burra, gra e fëmijë nga mosha 14-vjeçe. Këto metoda përfshinin lidhjen e njerëzve për shufre të metaltë apo të drurit, të punuara enkas për të dyshuarit, ku kishte edhe keqtrajtim seksual, goditje me rrymë dhe torturë me ujë.
Shumë prej tyre janë akuzuar për vepra terroriste, por ai nuk beson se një nga qindra të burgosur të ketë qenë i përfshirë në ndonjë krim. Torturave u vinte fundi nëpër qendrat e ndalimit në stacionet e policisë, vetëm nëse i dyshuari pranonte pretendimet e tyre. Më pas ata vendoseshin në dhoma tjera që ngjanin me llogoret ku punonin punë të ndryshme.
Funksionarët e qeverisë kineze në Sindiang gjatë një konference për media të mbajtur javën e kaluar, kanë prezantuar burrin për të cilin thonë se është ish-i burgosur, i cili sipas tyre ka mohuar të ketë pasur dhunë nëpër kampe, duke i cilësuar pretendimet si “gënjeshtra”.
Departamenti Amerikan i Shtetit vlerëson se deri në 2 milionë ujgurë dhe pakica të tjera etnike janë ndaluar në kampe internimi në Xinjiang që nga viti 2017. Kina thotë se kampet janë profesionale, që kanë për qëllim luftimin e terrorizmit dhe separatizmit dhe ka mohuar vazhdimisht akuzat për abuzime të të drejtave të njeriut në Rajoni.
