Ditët e fundit është rritur ndjeshëm numri i personave që shtrohen në spitalin infektiv për shkak të COVID-19. Mesatarisht në ditë shkon në 28 numri i urgjencave që shtrohen pranë këtij spitali.
Gjatë dy javëve të para ka pasur një trend pothuajse në rritje, konstant por në rritje të numrit të të shtruarve. Numri mesatar ditor mund të jetë 25-28 në ditë që janë prezantime dhe shtrime njëkohësisht. Mjekja infeksioniste Esmeralda Meta thotë se çdo ditë 8 pacientë zhvendosen drejt spitalit COVID 3. Aty ku hospitalizohen pacientët në gjendje më të lehtë. Mjekja gjithashtu thotë se pacientët që kanë marrë të dyja dozat e vaksinës janë në gjendje më të mirë.
“Mund të luhatet nga 6-8 pacientë në ditë që kalojnë nga njëri spital për tek spitali tjetër. Pacientët që shtrohen në spitalin COVID 1 bëhet fjalë për pacientë me simptoma klinike të moderuara në të rënda. Natyrisht mes këtyre pacientëve pastaj vlerësohet, bëhet triazhimi në spitalin COVID 1 dhe pacientët që nuk kanë nevojë për high fluks të oksigjeno-terapisë apo respiratore bëhet e mundur transporti drejt spitalit COVID 3. Me të dyja dozat e vaksinës janë në gjendje të moderuar do thoja. Në përqindjen më të lartë janë persona jo të vaksinuar do thoja”.
Në të dyja spitalet COVID ka 152 pacientë, 15 prej të cilëve janë në gjendje më të rënduar.
