Që nga fundi i vitit 2021 dhe në janar të këtij viti çmimet e ushqimeve në vendin tonë vazhdojnë të rriten. Peshën më të madhe të kësaj rritje e vuajnë pensionistët dhe familjet që ka të ardhura të vetme ndihmën ekonomike. Në lidhje me këtë problematikë ka folur në një intervistë televizive ekspertja Dorela Beqaj. Ajo tha se rritja e inflacionit solli dhe shtrenjtimin e ushqimeve, energjisë dhe karburanteve, ndërsa theksoi se kjo gjendje do të vazhdojë edhe për 2 vitet e ardhshme.
“Inflacioni nënkupton një rritje të çmimeve të produkteve kryesisht të shportës bazë, energjisë dhe hidrokarbureve që prekin direkt xhepat e qytetarëve, dhe ndikon direkt në standardin e jetesës së qytetarëve. Inflacioni aktualisht është në 3.7% që është normë shumë e lartë në krahasim me vitet e tjera. Nëse llogarisim edhe rritjen e pagës mesatare në vitet e fundit, rritja reale për shkak të inflacionit ka qenë vetëm 0.7%, dhe nëse kjo rritje e inflacionit do të vazhdojë të rritet, mund të përfundojmë në zhvlerësim të pagës reale që do të thotë se duhet të merren masa, të ketë indeksim të pagave ose subvencionim të familjeve në nevojë”, shprehet
Në këtë kushte ekspertja dhe studiuesja e politikave ekonomike Dorela Beqaj thotë se duhet të subvencionohen familjet në nevojë, qoftë dhe me paga lufte, në të kundërt varfëria do të thellohet dhe do të jetë e pamundur dalja nga kjo krizë.
“Jemi përballë një situate ku më shumë familje mund të përballen me varfërinë, dhe ata që janë në varfëri mund të përballen me varfëri ekstreme, dhe që të zbutet ky impakt duhet të ndihmohen direkt familjet. Përshembull, subvencion direkt për disa produkte të mallrave të shportës për këtë kategori që preken direkt, familje që janë me pagë minimale apo ndihmë ekonomike. Në një periudhë afatshkurtër mund të përdoreshin edhe paga lufte, pasi nëse përdoreshin gjatë ekonomia në një periudhë të tillë rëndon buxhetin, por duke qenë se është një periudhë e pasigurt le të konsiderohet një periudhë krize dhe të shikohen politika të tilla për familjet në nevojë”, pohon Beqaj. Ndërsa tha se edhe pikat e shitjeve nuk duhet të abuzojnë me çmimet sepse ka shumë raste kur rritja bëhet përtej vlerës së tregut.
Discussion about this post