Rritja e çmimit të ushqimeve dhe naftës është kthyer në një problem shumë të madh për të gjithë shqiptarët, ku pjesa më e madhe janë në luftë për mbijetesë. Për këtë arsye, ditën e sotme banorët e qytetit të Kukësit kanë dalë në protestë, ku i bëjnë thirrje qeverisë që të marrë masa. Një prej tyre tha se rritja e çmimit të naftës shkatërron popullin dhe favorizon oligarkët, prandaj sipas tij kjo qeveri duhet të largohet, pasi të gjithë deputetët po tallen me qytetarët e thjeshtë.
Ai tregoi se as ndihmën ekonomike nuk po e marrin, as ushqime nga shoqatat përkatëse, pasi fillimisht favorizohen ata që kanë miq në bashki apo institucione të tjera.
“Çmimi i naftës po favorizon oligarkët. Ne me rrogat që kemi nuk i përballojmë dot. Po na i japin me çmime dyfish më të lartë. Unë nuk dua më as Sali as Rama as Bashën, ata duhet të shkarkohen të gjithë. Rama shkon në Dubai dhe ministrat tallen me ne në Parlament. Ne jemi pa punë, nuk na përfillin edhe ndihma ekonomike po na ndërpritet, këta rrisin çmimet. Ju i shihni sa të varfër jemi, ne po dalim nga halli këtu, ata duan të duken në media. Në lidhje me rritjen e çmimeve dua që të ulen, pasi edhe shoqatat s’po na ndihmojnë më, por ua japin vetëm atyre që kanë miqësi”, tha një banor.
Ndërsa një tjetër tha se qeveria gënjen kur thotë se e njëjta situatë është edhe ne europë. Duk bërë një paralelizëm ai tha se në vendet e tjera, qoftë edhe në rajon, rrogat janë të larta dhe shërbimet janë më të mira. Ndërsa theksoi se në Sheperi rriten vetëm çmime dhe dobësohen shërbimet. Ai tha se qytetet e vogla në Shqipëri janë të varfra dhe njerëzit po vdesin urie. “Ne do vazhdojmë të protestojmë për rritjen e çmimit të ushqimeve dhe naftës. Këta thonë kështu ndodh edhe në europë, por në europë rriten çmimet ama rriten edhe rrogat, ndërsa ne as rroga nuk rriten, por shumica jemi pa punë. Janë rritur vaji 3 mijë lekë, orizi, mielli, janë ushqime bazë dhe në nuk i përballojmë dot, do vdesim urie”, tha një tjetër banor. Ndërsa u shpreh se shumë të tjerë nuk dalin në protestë pasi kanë frikë se i heqin nga puna. Mbrëmjen e kaluar protesta për çmimet u zhvilluan në Tiranë, Durrës dhe Korçë, ndërsa është paralajmëruar se do të vazhdojnë.
Discussion about this post