Kriza që ka kapluar vendin tonë i ka dhënë rezultatet e para, teksa një pjesë e bizneseve janë drejt falimentit, e shumë të tjera po hasin vështirësi. Vendi ynë mund të shkojë drejt një varfërie akoma më të madhe për shkak të faktorëve negativë.
Përgjatë ditëve të fundit, çmimet e produkteve në vendin tonë janë rritur, duke u bërë të papërballueshme për qytetarët. Energjia elektrike, gazi e nafta shënuar ndër të parat rritje të theksuar të çmimit, duke u ndjekur nga produktet bazë të konsumit të përditshëm, teksa tashmë dhe transporti publik urban njofton rritjen e biletës. Në një kohë kur shpenzimet rriten, rrogat mbeten ende në vend, e kështu shqiptarët mbeten në udhëkryq për të gjetur një zgjidhje.
Nga ajo që raporton Banka Botërore, duke parë këtu dhe ritmin e ulët me të cilin po ecën procesi i rimëkëmbjes pas pandemisë, i sugjeron Shqipërisë të mos mbështetet vetëm tek ndërtimi, si zgjidhja kryesore. Hilda Shijaku, ekonomiste e lartë në BB, thekson se duhet të investohet në edukim, inovacion si dhe në ekonominë e gjelbërt.
BB llogarit se pas tkurrjes me 4% në vitin 2020, rritja e PBB-së do të jetë 7.2% sivjet, dhe do të mbështetet kryesisht te konsumi, turizmi dhe ndërtimi.
