“Zgjohen” qytetarët shqiptarë. Sot, në orën 17:00 ata do të protestojnë përpara godinës së Kryeministrisë kundër rritjes së çmimeve të bukës, kafes, dritave dhe karburantit. Disa ditë pasi edhe vetë kryeministri Edi Rama paralajmëroi një krizë energjetike, qytetarët janë të vendosur që të dalin të kërkojnë llogari për të parandaluar rritjen e çmimeve.
“Ja ashtu rastësisht! Kam një punë dhe rruga më bie nga: Kryeministria të mërkurën, ora 17:00,”-shkruhet në posterin e përgatitur për këtë protestë.
Nga ana e Policisë së Shtetit nuk ka ende asnjë reagim për protestën në fjalë. Ndërsa nuk dihet nëse efektivët do të jenë para Kryeministrisë këtë pasdite për të shpërndarë grumbullimin e qytetarëve, referuar rregullave të parandalimit të përhapjes së Covid-19.
Kujtojmë që vetëm pak ditë më parë, kreu i Qeverisë Edi Rama deklaroi se qytetarët duhet të përgatiten krizën energjetike; rritjen e çmimit të gazit me rreth 250%, atë të karbonit me rreth 80% dhe të naftës.
Rama tha se kjo krizë do prekë jetën e familjeve dhe bizneseve, por qeveria do u qëndrojë pranë shtresave në nevojë, biznesit të vogël dhe konsumatorëve familjarë.
Fjalë të cilat ndër vite liderët që kanë ardhur në pushtet “i recitojnë” si vjershë por nuk bëjnë asgjë.
