Në gamën e gjerë të problematikave në vend, së fundmi kanë qenë qytetarët e Vlorës ata të cilët kanë ngritur zërin sa i takon rritjes së çmimeve të Fruta-Perimeve dhe ushqimeve të tjera. Në një intervistë për Gijotina.com qytetarët janë shprehur të revoltuar se mundësia për të përballuar është pothuajse zero, në krahasim me pensionet e pagat që ata marrin. Më konkretisht njëri nga banorët shprehet se fajtor për këtë situatë është padyshim qeveria e cila, duhet të “vejë dorën në zemër”, e të marrë masa.
“Shumë të larta çmimet, çfarë të themi të gjitha frutat perimet ushqimet. Me 130 mijë që marr unë nuk i përballoj dot asnjëherë. Çfarë të themi në tani, të vërë zemrën në dorë qeveria”, është shprehur një banor.
E ndërsa theksojmë se ka edhe pensionistë e të moshuar, që për arsye shëndetësore specifike e kanë të nevojshme konsumimin e zarzavateve, por me rritjen e çmimeve, mundësia për t’i blerë është e papërballueshme.
“Çmimet janë shumë të larta shumë shumë të larta, në pensionistët nuk i përballojmë dot. Hymë në treg të pyesësh për ndonjë gjë të gjitha janë rritur. Nga tregu i shumicës tek tregtarët këtu është rritur çmimi. Unë jam në pension koprative marr 80 mijë lekë të vjetra, më thuaj ti a përballohet? Unë jam diabetik, jam i detyruar të ble perime, po si t’i përballojmë këto çmime”, është shprehur një tjetër banor.
Po ashtu burime për Gijtoina.com bëjnë me dije se produkti vjen i shtrenjtë nga vetë furnitorët, ndaj është krijuar kjo situatë. Këta të fundit theksojnë se perimet që janë rritur në çmim, janë kryesisht domatja e zarzavatet jeshile.
“Ne i marrim atje të shumicat ushqimet, rritet çmimi atje i rrisim dhe ne me 100 lekë këtu. Sa më lirë ta marrim neve e sa më lirë të shesim, aq me mirë vene edhe për popullin që blen. Nuk janë rritur të gjitha, domatja e disa perime të tjera, zarzavatet jeshile. Nuk ka shumë xhiro se nuk kanë njerëzit lekë. Duhet të kenë rroga sikur pensionistët të kishin rrogën 500 mijë lekë, nipër e mbesa e të gjithë do i mbanin, do kishte blerje më shumë” , është shprehur furnitorja.
Është e disata herë që qytetarët ankohen për rritjen e çmimeve të fruta-perimeve nëpër tregje. / A.L gijotina.com /
