Kompanitë energjetike po falimentojnë dita ditës, kjo për shkak të krizës që ka prekur botën. Në Britaninë e Madhe, një tjetër emër ka dalë nga tregu e bëhet fjalë për Goto Energy.
Rreth 22 mijë banorë furnizoheshin nga kompania në fjalë, të cilët tashmë do të drejtohen diku tjetër. Disa firma të vogla janë shkatërruar plotësisht pas rritjes globale të çmimeve të gazit.
Rregullatori britanik i energjisë, Ofgem, tani do të gjejë një furnizues të ri për këto familje.
Kolapsi i Goto Energy e çon numrin e klientëve të prekur nga vala aktuale e falimentimeve të kompanive energjetike në BM në më shumë se dy milionë.
“Rritja e paparë e çmimeve globale të gazit, që janë rritur 250 për qind që nga fillimi i vitit, – po bën presion financiar mbi furnizuesit”, deklaroi Ofgem.
Goto Energy tashmë është furnizuesi i 16-të që del nga tregu, që nga fillimi i vitit 2021.
Javën e kaluar, ishte Pure Planet, që mbështetej nga gjiganti i naftës BP dhe Colorado Energy, që falimentoi.
Gjithashtu dhe Avro Energy, People Energy dhe Green Supplier Limited, kanë falimentuar gjatë kësaj periudhe.
