Bizneset në vend deklarojnë se rritja e taksave për sektorin e bujqësisë do të rrisë çmimet dhe pengojnë prodhimin vendas. Përmes një interviste televizive, Donjaldo Hoxha nga Industria e Përpunimit të Qumështit thotë se ky sektorë ka probleme financiare dhe propozimet e fundit të qeverisë në paketën fiskale do ta rëndojnë edhe më tej situatën.
“Do të ketë ndikim direkt në kostot e lëndës së parë ushqimore për të gjitha fermat blegtorale në vendin tonë. Aktualisht që ne flasim, fermat po përballen me çmime të rritura për misrin, jonxhën, elbin dhe çdo produkt tjetër. Vendosja e kësaj takse nga 1 janari, do të bëjë që këto çmime të rriten akoma më shumë. Me rritjen e çmimeve dhe kostos së lëndës së parë, prodhimi vendas pengohet dhe nxitet vetëm importi”, tha ai.
Ndër të tjera Hoxha shprehet se, heqja e kompensimit 6% që prodhuesit bujqësorë përfitojnë aktualisht do t’i vendosë ata në një pozitë të vështirë dhe kjo do të reflektohet në rënien e prodhimit të lëndës së parë. Por si mund të shmanget kjo
“Duhen marrë masa që të mbrojnë si produktin vendas, ashtu edhe industrinë e agro-përpunimit. Janë modelet e rajonit që janë shumë të thjeshta dhe shumë të qarta për t’u zbatuar. Është shumë e rëndësishme që TVSH në shitje të bëhet siç e ka rajoni, 5 ose 6% dhe që fermeri të mbështetet si në sasinë e qumështit të prodhuar, ashtu edhe në numrin e bagëtive që disponon, ashtu edhe në lindjet e reja”, u shpreh ai. Sakaq, ai kërkoi që qeveria të mos ndërmarrë këto hapa të pastudiuara.
Discussion about this post