Përleshja e banorëve të Baks Rrjollit për konfliktin e pronësisë është zhvendosur në Tiranë, ku përfaqësues të të dy palëve janë konliktuar pas debatit në emisionin Opinion. Banorët dhe zotëruesit e pronës janë konfliktuar fizikisht dhe kanë përfunduar në spital, sapo kanë dalë nga emisioni, ndërsa kanë bërë edhe referimet në polici. Të dyja palët pretendojnë se janë provokuar dhe më pas dhunuar.
Mungesa e shtetit dhe drejtësisë për zgjidhjen e konfliktit të pronës në Baks Rrjoll ka prodhuar një tjetër incident të rëndë, me të plagosur. Mbrëmjen e djeshme, banorë të Baks Rrjollit janë përballur me argumente në emisionin Opinion, situata ka degraduar në përleshje e dhunë fizike pas daljes nga emisioni. Si banorët pretendues të pronës, por edhe pronari me vendim gjykate pretendojnë se janë provokuar e më pas dhunuar. Fatmir Shpellzaj, i cili pretendon që e ka me dokumente dhe e ka konfirmuar me vendim gjykate këtë pronë, denoncon se pas emisionit djali i tij është dhunuar nga banorët, duke përfunduar në spitalin e Traumës.
Sapo dola nga Spitali i Traumës, ku për orë të tëra kam qëndruar pranë tim biri, i cili u masakrua brutalisht nga një tufë njerëzish që në vend të dokumenteve, kanë në dorë vetëm dhunën. Ata që kanë dhunuar varret e familjes sime, dje dhunuan edhe djalin tim dhe kjo nuk është më një çështje prone. Ngjarja ndodhi dje pasi zgjodha të shkoj për të mbrojtur të vërtetën time në emisionin Opinion përballë disa personave që prej kohësh kanë ngritur një histori të rreme mbi Rrjollin, duke manipuluar ndjeshmërinë e njerëzve dhe duke u paraqitur si pronarë apo trashëgimtarë të një toke për të cilën nuk kanë asnjë dokument.
Ky reagim është pasuar nga ai i banorëve të zonës, që gjithashtu pretendojnë se kanë dokumente pronësie të trashëguara dhe se toka po u vidhet nëpërmjet falsifikimit. Sipas banorëve, ka qenë djali i Fatmir Shpellzajt që i shoqëruar nga disa persona të tjerë ka provokuar dhe kërcënuar banorët pas emisionit në tentativë për tu marrë dokumentet.
Sipas deklarimit të Prekë Molles, konflikti ka nisur pasi djali i Fatmir Shpellzaj e ka provokuar fillimisht duke e ndeshur me sup, çka më pas ka sjellë një përplasje verbale mes tyre. Gjatë debatit, djali i Shpellzaj është shprehur se kishte ardhur i përgatitur. Prekë Molla deklaron gjithashtu se djali i Shpellzaj ka qenë i shoqëruar nga rreth 10–15 persona, të cilët sipas tij kanë qenë të armatosur dhe të pajisur edhe me shkopinj bejzbolli. Sipas tij, ata kishin ardhur me qëllimin për t’i marrë dokumentet, pasi kishin menduar se ai ndodhej vetëm. Ai shprehet se është tërhequr zvarrë nga disa prej tyre në përpjekje për t’i marrë dokumentet, por pavarësisht kësaj ata nuk kanë arritur ta realizojnë këtë qëllim.
Pas përshkallëzimit të situatës janë përfshirë edhe banorë të tjerë të Rrjollit, disa prej të cilëve kanë pësuar lëndime dhe kanë përfunduar për trajtim në spital. Të dyja palët i kanë bërë thirrje policisë që të hetojnë këtë ngjarje për të parandaluar përshkallëzimin e saj.
Discussion about this post