Drejtuesi politik i PD-së për Tiranën, Belind Këlliçi, i është drejtuar me kritika të ashpra kryeministrit Edi Rama.
Sipas Këlliçit, gjuha seksiste dhe fyese që përdor kryeministri në takimet e tij elektorale, sidomos me gratë dhe vajzat, është e papranueshme.
Me anë të një reagimi në facebook, Këlliçi u shpreh se deklaratat e Ramës janë një shpërfillje ndaj grave dhe vajzave.
“Për votat e PS-së, ai pretendon të shndërrojë në ‘dashnore’ votueset për herë të parë”, shkruan Këlliçi.
Ai thotë se është koha që ky politikan të marrë një mësim të vlefshëm, ndërsa thekson se “vajzat dhe gratë shqiptare nuk janë dashnoret e politikës”.
Reagimi
“Rroftë dashnorja
Gjuha seksiste dhe fyese e Edi Ramës është e papranueshme!!!
Në një shpërfaqje të paprecedentë të injorancës së tij dhe shpërfilljes ndaj grave dhe vajzave, ai pretendon që të instrumentalizojë madje dhe lidhjet e tyre emocionale e intime, ne funksion të partisë shtet!
Për votat e PS-së, ai pretendon të shndërrojë në “dashnore” votueset për herë të parë.
Kjo nuk është hera e parë që ky individ me pushtet sillet në mënyrë të papërgjegjshme ndaj grave.
Që nga koha kur kërcënonte me sëpatë gazetaret e vendit, ke prekja me duar dhe goditja e gazetareve opozitare, e deri tek fyerjet banale në sallën e kuvendit, mizogjinia e tij është e dukshme.
Është koha që ky politikan të marrë një mësim të vlefshëm.
Vajzat dhe gratë shqiptare nuk janë dashnoret e politikës!!!
Ato me vullnetin dhe punën e tyre çojnë përpara këtë shoqëri, në spitale, në shkolla, në fabrika, në familje.
Ato janë të angazhuara në politikë në çdo nivel, dhe analiza e tyre për realitetin është ku e ku më e saktë se ç’imagjinon mentaliteti prej horri lagjeje i një njeriu që fatkeqësisht është kryeministër i Shqipërisë.
Vajzat dhe gratë e Shqipërisë, pavarësisht bindjeve apo përkatësive politike, do i japin atij një mesazh ekzemplar në kutinë e votimit”; shkruan Këlliçi.
Rama tha dje me të rinjtë në “Ali Dem”, se “na duhet çdo votë, na duhet çdo lidhje të vihet në funksion të kësaj vote”
Kryeministri iu tha vajzave të reja, se nëse i dashuri i tyre do të votojë “bufin e kënetës”, mos t’ua varin.
“Kur ju të merrni pasaportën në dorë, do thoni e kam dhe unë qepallën time këtu te kjo pasaporta. Kurse ata do shohin pasaportën dhe do thonë ‘rroftë dashnorja ime, se të ishte për mua nuk do futesha kurrë në BE’ tha Rama.
Discussion about this post