Shqipëria ka disa “rrugë të florinjta”, ku qeveria e Edi Ramës ka hedhur dhjetra milionë euro për riparime e rikonstruksione aksesh kombëtare e urbane. Por, aksi “Kashar-Pezë-Lekaj”, pjesë e rrugës Milot-Fier, mund të quhet pa mëdyshje si “rrugë diamanti”. Plot 475 milionë euro për një aks me gjatësi 33.6 kilometra. Për ta thjeshtuar, rreth 15 milionë euro për një kilometër rrugë, e cila ka kalon në një terren fushor ose maksimumi kodrinor të ulët.
Procedura koncesionare u hap në mes të vitit 2022 nga Ministrja e Infrastrukturës, Belinda Balluku. Kontratën koncesionare “të diamantë” e ka fituar një bashkim operatorësh, i drejtuar nga “Gjoka Konstruksion”./ E njëjta kompani që është paguar dhjetra miliardë lekë për Rrugën e Arbrit, e cila nuk po mbaron kurrë.
Koncesioni
Në gusht të vitit 2022, Ministria e Infrastrukturës shpalli procedurën për dhënien me koncesion të aksit rrugor “Kashar-Pezë-Lekaj”, me fond limit rreth 480 milionë euro. Sipas dokumentave të tenderit, ky aks rrugor ka një gjatësi totale prej 33.6 kilometra dhe nis në fundin e aksit tjetër, Milot-Thumanë dhe përfundon aty ky fillon loti tjetër, Lekaj-Fier.
Terreni ku kalon ky aks rrugor është thuajse i gjithi fushor, gjë që do të thotë se nuk ka nevojë për vepra të ndërlikuara infrastrukturore, si ura apo tunele. Në fillim të kësaj jave, Ministria e Infrastrukturës shpalli rezultatet e procedurës koncensionare. Në garë kanë marrë pjesë një grup kompanish, i drejtuar nga “Gjoka Konstruksion”, të cilët kanë paraqitur ofertën 476 milionë euro.
Diçitura: Rezultatet e procedurës koncesionare Kashar-Pezë-Lekaj
Konkurenti tjetër ishte po një grup kompanisht, të drejtuara nga “4 AM”, të cilët paraqitën ofertën 470 milionë euro. Në përfundim, institucioni i Ballukut shpalli fitues bashkimin e operatorëve me ofertën më të lartë, të drejtuar nga “Gjoka Konstruksion”.
Koncesioni i dytë
Në të njëjtën ditë, në faqen zyrtare të Agjencisë së Prokurimit Publik shpallen rezultatet e procedurës koncesionare të një tjetër loti të rrugës “Milo-Fier”. Në atë procedurë, u tenderua aksi nga Miloti në Thumanë. Ky aks është i gjatë 13.5 kilometra dhe Balluku kishte vendosur në dispozicion rreth 45 milionë euro. Në tender morën pjesë katër konkurentë.
Shoqëritë “ANK” dhe bashkimi i operatorëve “Vega & Everest”, skualifikuan për shkak se nuk plotësonin kriteret e përcaktuara, siç thuhet në dokumentat zyrtare. Në garë mbetën një bashkim kompanish të drejtuara nga “Gener 2”, të cilët paraqitën ofertën 44.6 milionë euro; dhe një tjetër bashkim operatorësh, të drejtuar nga “Salillari”, të cilët ofruar afërsisht 44 milionë euro.
Diçitura: Rezultati i procedurës koncesionare për aksin Milot-Thumanë
Në përfundim, Belinda Balluku shpalli fituese grupin e drejtuar nga ‘Gener 2”, i cili do të ndërtoj edhe aksin tjetër Thumanë-Kashar.
Kosto stratosferike
Ndërtimi i rrugës Milot-Fier do të kushtojë 837 milionë euro. Rruga ekzistuese Milot-Thumanë 13.5 kilometra e gjatë do të rehabilitohet për t’iu përshtatur një aksi me shpejtësi të lartë. Rikonstruksioni do të kushtojë 44.6 milionë euro. Autostrada do të lidhet më pas me rrugën Thumanë-Kashar dhe kalimi i mjeteve aty do të kushtojë 2.5 euro. Një tjetër kontratë koncesionare është ajo për aksin Kashar-Pezë-Lekaj, 33.6 kilometra rrugë e re, e cila do të kushtojë 474.8 milionë euro.
Segmenti do të përfundojë me rrugën Lekaj-Konjat-Fier. 42.2 kilometra të këtij aksi do të rehabilitohen me një kosto 317.6 milionë euro. Fatura e ndërtimit të rrugëve do të përballohet nga kompania që do të fitojë tenderin, e cila më pas do të vendosë tarifa për kalimin e automjeteve, ndërsa buxheti i shtetit do t’i mbulojë një pjesë të trafikut nëse fluksi i mjeteve nuk do të jetë sipas skenarit të tenderit.
Vlera e tarifës dhe sasia e fluksit që do të garantojë buxheti do të jenë përcaktuesit e përzgjedhjes së fituesit. Shqipëria tentoi të jepte me koncesion të gjithë aksin Milot-Fier në vitin 2020 për një vlerë ndërtimi 1.18 miliardë euro. Por tenderi u anulua pasi kompania pjesëmarrëse zotohej të përfundonte punimet për 5 vjet.
Në dokumentet e tenderit qeveria kërkon që e gjithë vepra të mbarojë brenda 3 vitesh e gjysmë. Ndërsa tarifa për rrugën nga koncesionarët do të vilet deri në vitin e 35-të të kontratës. Periudhë pas të cilës segmenti do t’i transferohet shtetit.
Lexo edhe: “Lekaj-Fier” e “Thumanë-Kashar”, koncesione me fitim 564 përqind!
Discussion about this post