6 muaj më parë qeveria u mburr për realizmin e projektit, por asfalti i rrugës rurale Librazhd-Babje është prishur tërësisht, duke u kthyer në burim aksidentesh. Në të gjithë aksin vihen re çarje të asfaltit dhe në pjesë të tjera është hequr pjesa e shtruar dhe janë krijuat gropa të mëdha. Banorët e zonës janë ata që kanë ngritur këtë shqetësim në medie, duke thënë se, punimet janë kryer me cilësi të dobët, pasi janë bërë sa për ‘sy e faqe’ gjatë kohës së fushatës elektorale. “Nuk e di, kanë hedh zhavorr apo çfarë kanë bërë?! Është çarë këtu tek pylli e deri tek lokali”, tha një banor.
Pavarësisht, se banorët ankohen se kjo rrugë po shkakton aksidente të shpeshta si dhe po nxjerrë jashtë përdorimit të automjetet e tyre, Bashkia Librazhd tregohet tërësisht neglizhente. Kryetari i Bashkisë së Librazhdit, Kastriot Gurra i kontaktuar me telefon nga “Report Tv” është shprehu se investimi është kryer nga Fondi Shqiptar i Zhvillimit, ndaj nuk mban përgjegjësi për këto punime, edhe pse përfituese e rrugës së re është bashkia.
Kujtojmë se, sipas të dhënave të publikuara nga vetë qeveria rikonstruksioni i aksit rrugor Babje dhe Polis me vlerë 203 milionë lekë u financua nga Fondi Shqiptar i Zhvillimit, ndërsa tenderin e fitoi kompania “Vëllezërit Hysa”. Punimet nisen në gusht 2020 dhe duhej të përfundonin në shkurt 2021, por pavarësisht se u mbyllën me vonës, sërish ishin punime jocilësore.
Discussion about this post