Enkelejd Joti i RTSH e ka nisur këtë muaj me shpenzime pa kriter, me paratë që merr nga xhepat tanë. Para se Thoma Gëllçi të binte në burg, RTSH-ja bëri një tender me objekt “blerje shërbimi për platformën “OTT” me fond limit 85.113.600 lekë të reja. Në atë kohë, në tender mori pjesë vetëm një kompani që ofroi një shifër sa 99.7% e fondit limit të tenderit, duke fituar çdo qindarkë të akorduar nga RTSH-ja. Ndërkohë edhe pasardhësi i Gëllçit po ecën në të njëjtat hapa. Ai po bën tender me objekt “për shërbimin e platformës OTT për RTSH-në”, me qëllim mirëmbajtjen dhe blerjen e pajisjeve multimediale dhe infrastrukturën e rrjetit.
Në dokumentin e publikuara së fundmi në Agjencinë e Prokurimeve Publike bëhet me dije se drejtori i RTSH-së ka akorduar një shumë prej 169 milionë lekësh për shërbimin e OTT-së. Kështu, Joti po harxhon dyfishin e shumës që ka kushtuar komplet platforma në kohën e Gëllçit, kur u ble për 85 milionë lekë. I gjithë ky shpenzim bëhet në një pikë kur vendi është në krizë dhe kur nuk dihet nëse OTT do të jetë e aksesueshme nga qytetarët. Por, edhe nëse do të jetë funksionale, sipas rregullit kostoja e mirëmbajtjes duhet të jetë sa 10 apo 20% e vlerës së blerjes së produktit, jo sa 200 % e vlerës së tij.
Çfarë është OTT?
Platforma OTT është televizion nëpërmjet internetit over the top. Sipas parashikimeve te Gëllçit me këtë platformë çdo program televiziv shihet jo në kohën reale, por disa orë dhe ditë pasi ai të jetë transmetuar. Shërbimi u ofrohet të gjithë përdoruesve të platformës RTSH TANI që përdorin telefonat smart IOS ose Adroid, televizorët smart Android, që kanë të instaluar aplikacionin RTSH TANI, dhe që janë të lidhura me internetin. Shërbimi ofrohet deri në shtatë ditë nga koha reale e transmetimit të programit për kanalin RTSH 1 dhe për kanalin RTSH SHKOLLË, ndërsa tre ditë për kanalet e tjera.
Asaj kohe kreu i RTSH u shpreh se më së shumti kjo platformë po blihet për programin RTSH Shkolla, që iu duhej nxënësve gjatë kohës së pandemisë. Por, as atëherë kjo platformë nuk funksionoi si duhet, ndërsa tani askush nuk i ndjek programe të tilla. Natyrshëm lind pyetja, ku shkojnë paratë që në paguajmë për këtë televizion dhe pse nuk kontrollohen tenderat miliona euro të këtij institucioni?
Në çdo vit RTSH merr një fond më vete nga qeveria, përveç taksës 100 lekë që paguajnë çdo muaj qytetarët. Këto para i shpërdorojnë drejtorët si Enkelejd Joti, i cili po derdh lekët në një platformë që nuk funksionon. Në kohën kur televizorët janë bërë inteligjentë dhe me to mund të shohësh edhe platforma me pagesë shqiptarë dhe ndërkombëtarë, të paktën t’iu kishin hequr qytetarëve taksën 100 lekë.
Gjatë vitit 2021, sipas raportit vjetor, RTSH mori nga tarifa që paguan çdo familje shqiptare 1 miliard e 363 milionë e 257 mijë lekë (të reja), ndërsa iu shtuan edhe 573 736 000 lekë nga buxheti i shtetit. Shtojmë këtu tek fondi edhe 137 397 000 lekë nga qiratë që grumbullon institucioni, 143 546 000 lekë nga reklamat si dhe 16 000 000 lekë nga shitjet e materialeve arkivore etj. Një lumë parash, shumica e të cilave shkon për tendera e shërbime të panevojshme të firmosura nga drejtori Enkelejd Joti.
Discussion about this post