Presidenti i Federatës Mbretërore Spanjolle të Futbollit, Luis Rubiales ka pranuar se ai ka bërë një gabim duke i dhënë një puthje të padëshiruar yllit spanjoll Jennifer Hermoso pasi 33-vjeçarja mori medaljen e saj të artë pas fitores së ekipit në finalen e Kupës së Botës për femra ndaj Anglisë të dielën, me rezultatin 1-0.
Rubiales është përballur me kritika të ashpra për incidentin, me politikanët dhe gazetarët që e kanë cilësuar sjelljen e tij “të papranueshme” dhe “thjesht të neveritshme”.
“Ka një ngjarje për të cilën duhet të pendohem, e cila është gjithçka që ndodhi mes lojtares dhe meje, me një marrëdhënie madhështore mes nesh të dyve, njësoj si me të tjerët”, ka thënë krue i federatës spanjolle.
“Dhe mirë, me siguri kam bërë një gabim, duhet ta pranoj këtë. Në një moment ngazëllimi, pa ndonjë qëllim të keq, ndodhi ajo që ndodhi – mendoj në një mënyrë shumë spontane. E përsëris, nuk ka pasur mendime të këqija mes asnjërit prej nesh”.
“Këtu nuk e kuptuam sepse pamë diçka të natyrshme, normale dhe në asnjë mënyrë. Por, jashtë flluskës, duket sikur është kthyer në një stuhi dhe kështu, nëse ka njerëz që janë ndjerë të ofenduar, më duhet të them se më vjen keq”, ka shtuar më tej ai.
Rubiales ishte në skenë për ceremoninë e ndarjes së çmimeve të FIFA-s pas finales, së bashku me personalitete të tjera, duke përfshirë presidentin e organit drejtues botëror të futbollit, Gianni Infantino, mbretëreshën e Spanjës – Letizia dhe kryeministrin australian Anthony Albanese.
Video tregon Rubiales duke përqafuar Hermoson, më pas duke i vendosur të dyja duart në kokë para se ta puthë. Më pas ai e përkëdhel në shpinë ndërsa ajo largohet.
“Hej, nuk më pëlqeu, eh”, kishte thënë Hermoso teksa me sa duket u përgjigjet pyetjeve në lidhje me incidentin në një video live në Instagram – një klip i së cilës u shpërnda nga gazetarja spanjolle Irati Vida në X, platforma e njohur më parë si Twitter.
Discussion about this post