Pas dështimit me nismën “Thurrje” në zgjedhjet e 25 Prillit ku nuk siguroi votat e nevojshme për t’u bërë deputete dhe pas sharjeve ndaj Sali Berishës, Rudina Hajdari është rikthyer tashmë në Partinë Demokratike. Në një intervistë për mediat, Hajdari është shprehur se nuk është larguar asnjëherë nga PD-ja, por ka qenë e përjashtuar.
“Sot kam bërë rianëtarësimin dhe patjetër që mund të themi që jam rikthyer në PD. Unë nuk jam larguar asnjëherë në fakt, sepse u përjashtova, duke qenë se mbajta mandatin. PD-ja ka qenë gjithmonë pjesë e familjes sime, kam një trashëgimi me të. Por ndihem e shqetësuar për të ardhmen e saj” – u shpreh Hajdari.
Edhe pse është rikthyer, Hajdari ka kritikuar përsëri Sali Berishën, duke e konsideruar si përgjegjës për situatën në PD. Ajo gjithashtu ka thënë se ky është momenti më i rëndësishëm që të gjithë ata që kanë dhënë kontribut të rikthehen nëse duan që PD-ja të rimarrë pushtetin.
“Berisha ka pasur gjithmonë rol në PD. Ndoshta nëse do të kishte bërë presion që të mos merreshin vendimet që u morën, ato nuk do të ishin marrë. Kështu që mendoj se edhe ai është përgjegjës. Ky është momenti më i rëndësishëm që të gjithë ata që kanë dhënë kontribut të rikthehen nëse duan që PD-ja të rimarrë pushtetin”.
E pyetur si e sheh të ardhmen e partisë nëse do të drejtohet nga Berisha, i cili është shpallur “non grata” nga Shtetet e Bashkuara, Hajdari tha se kjo nuk duhet të lidhet me fatin e PD-në, përkundrazi, duhet që ne ta shikojmë këtë moment si moment ringritjeje.
“Ky është fakt, por kjo nuk do të thotë se ai nuk ka mbështetje në PD. Kjo nuk duhet të lidhet me fatin e PD-në, përkundrazi, duhet që ne ta shikojmë këtë moment si moment ringritje, riformimi dhe të mblidhemi si grup. Sepse një individ nuk e bën dot partinë. Ndryshimet që ndodhën në statut janë të shëndetshme. I jep pushtetin anëtarësisë dhe ia heq kryetarit” – tha Hajdari.
Discussion about this post