Blutë japin detajet e para nga incidenti në Uzinën Ushtarake në Gramsh, ku dy ushtarë shqiptarë mbetën të plagosur rëndë pas sulmit me lëndë kimike. Sipas policisë, sulmi është bërë nga shtetasi rus, M.Z 24 vjeç.
I riu gjatë ngjarjes së rëndë ishte i shoqëruar nga 2 shtetas të tjerë, të cilët e prisnin në makinë. Mësohet se uniformat blu kanë bërë të mundur bllokimin e mjetit me të cilin lëviznin, shtetasit e dyshuar si agjentë të shërbimeve sekrete ruse dhe të shoqërojnë në polici dhe rusen 33-vjeçare S.T dhe ukrainasin F.A, 25 vjeç.
“Nga shërbimet e Uzinës Ushtarake Çekin në Gramsh, është njoftuar se ne afërsi të rrethimit të uzinës është konstatuar një shtetas i paidentifikuar me aparat fotografik në dorë, i cili ka tentuar të fotografojë ambientet e zonës ushtarake.
Në momentin që 2 ushtarakët që ruanin objektin, e kanë pikasur dhe i janë afruar ta ndalojnë dhe ta kapin, shtetasi i huaj iu është kundërpërgjigjur me spray neuroparalizues, por 2 ushtarakët që ruanin uzinën kanë bërë të mundur neutralizimin e tij.
Shërbimet e Policisë me të marrë njoftim kanë shkuar menjëherë në vendngjarje dhe kanë bërë shoqërimin e shtetasit rus, M. Z., 24 vjeç, në ambientet e Komisiaratit të Policisë Gramsh, për veprime të mëtejshme.
Gjithashtu, shërbimet e Policisë nga veprimet paraprake hetimore kanë marrë informacion se ky shtetas ishte shoqëruar edhe nga dy shtetas të tjerë dhe menjëherë kanë ngritur pika kontrolli dhe kanë kontrolluar zonën.
Shërbimet e Policisë bënë të mundur që në afërsi të kësaj zone të konstatojnë dhe të bllokojnë automjetin tip “Chevrolet”, me të cilin udhëtonin shtetasja ruse S.T. 33 vjeçe dhe shtetasi ukrainas F. A., 25 vjec, të cilët janë shoqëruar për veprime të mëtejshme.”-njofton policia.
Discussion about this post