Rusia mund të rinovojë akordin për grurin vetëm nëse…

Një delegacion rus, i cili zhvilloi bisedime me zyrtarë të lartë të OKB-së, tha të hënën se Moska është e gatshme për ta pranuar zgjatjen e afatit të marrëveshjes për eksportimin e drithërave, por vetëm për 60 ditë.

Kjo marrëveshje ka ndikuar në uljen e çmimeve globale të ushqimit gjatë luftës në Ukrainë.

Kombet e Bashkuara e rikonfirmuan përkrahjen për marrëveshjen e nënshkruar në korrik, duke e përshkruar si “pjesë e reagimit global ndaj krizës më të ashpër të kostos së jetesës në një gjeneratë”, raporton agjencia “Associated Press”.

Turqia dhe Kombet e bashkuara ndërmjetësuan për marrëveshjen që ia mundësoi Ukrainës – njëra ndër transportueset më të mëdha të drithërave në botë – eksportimin e ushqimit dhe plehrave artificiale nga tri porte detare në Detin e Zi.

Marrëveshja, e cila fillimisht kishte afat 120-ditor, u zgjat në nëntorin e vitit të kaluar. Kjo zgjate përfundon të shtunën dhe në tavolinë ishte një zgjatje tjetër 120-ditore.

Ukraina tha se propozimi rus për ta zgjatur marrëveshjen vetëm për 60 ditë bie ndesh me marrëveshjen, edhe pse gjuha e paktit lejon që palët ta “modifikojnë” atë – siç bëri Rusia të hënën.

Në Uashington, zëdhënësi i Departamentit të Shtetit, Ned Price, e theksoi nevojën për zgjatjen e afatit të marrëveshjes, duke e përshkruar atë si “instrument kritik në një kohë kritike”.

Moska ka shprehur zemërim për shkak se një marrëveshje paralele ka dështuar që t’ia hapë plotësisht derën eksporteve ruse të drithërave dhe plehrave përmes Detit të Zi.

Megjithatë, dërgesat e drithërave ruse ishin në nivel rekord ose afër tij në nëntor, dhjetor dhe janar, duke u rritur për 24 për qind në krahasim me periudhën e njëjtë para një viti, sipas të dhënave financiare të publikuara nga “Refinitiv”-i.

Zëdhënësi i Kombeve të Bashkuara, Stephane Dujarric, tha se kjo organizatë ka punuar për ta lehtësuar eksportin e prodhimeve bujqësore të Rusisë, duke theksuar se përderisa ushqimi dhe plehrat ruse nuk janë sanksionuar, kompanitë private kanë qenë të kujdesshme për t’u marrë me to.