Ambasadorja e Shteteve të Bashkuara të Amerikës në Shqipëri Yuri Kim ka shpërndarë deklaratën e DASH. Në të raportohet se Rusia ka blerë dronë nga Irani, duke shkelur kështu rezolutat e Këshillit të Sigurimit në OKB.
“Rusia ka blerë dronë nga Irani në kundërshtim me rezolutën 2231 të Këshillit të Sigurimit të OKB-së. Këto dronë po përdoren për të goditur civilët ukrainas dhe infrastrukturën civile kritike”, shkruan diplomatja amerikane në Twitter, duke shkëputur një pjesë të deklaratës.
Deklarata e plotë e DASH:
Sot, Shtetet e Bashkuara iu bashkuan Mbretërisë së Bashkuar dhe Francës në ngritjen e çështjes së transportimit të dronëve nga Irani në Rusi në një takim të Këshillit të Sigurimit të OKB-së, ku anëtarët e Këshillit morën informime ekspertësh nga Sekretariati i OKB-së mbi raportet e transferimit të këtyre armëve të rrezikshme.
Ne shprehëm shqetësimet tona të rënda për blerjen nga Rusia të këtyre UAV-ve nga Irani në kundërshtim me rezolutën 2231 të Këshillit të Sigurimit të OKB-së.
Shtetet e Bashkuara filluan të paralajmërojnë në korrik se Irani po planifikonte të transferonte UAV në Rusi për t’i përdorur në luftën brutale të Rusisë kundër Ukrainës dhe tani kemi prova të bollshme që këto dronë po përdoren për të goditur civilët ukrainas dhe infrastrukturën kritike civile.
Ndërsa Irani vazhdon të gënjejë dhe të mohojë ofrimin e armëve Rusisë për përdorim në Ukrainë, ne jemi të përkushtuar të punojmë me aleatët dhe partnerët për të parandaluar transferimin e armëve të rrezikshme në Rusi.
Ne nuk do të hezitojmë të përdorim sanksionet tona dhe mjete të tjera të përshtatshme për të gjithë të përfshirët. Ne gjithashtu do të vazhdojmë të shtojmë ndihmën e sigurisë ndaj Ukrainës, duke përfshirë aftësitë e mbrojtjes ajrore, në mënyrë që Ukraina të mund të mbrohet nga këto armë.
Discussion about this post