Rusia pretendon se e ka penguar ofensivën ukrainase në Donetsk

Ministria ruse e Mbrojtjes pretendon se ka penguar një ofensivë masive ukrainase në Donetsk.

Ajo ka pretenduar se ka vrarë 250 trupa ushtarake ukrainase, dhe se ka shkatërruar pajisje të armatosura.

Në video, për të cilën Rusia ka thënë se shpërfaq betejën, shihet një betejë me shumë pajisje luftarake të përfshira nga flakët.

Për kundërofensivën ukrainase flitet shumë në muajt e fundit, dhe Kievi ka thënë se nuk do të japë paralajmërim për nisje të saj.

Ministria ruse e Mbrojtjes ka thënë se Ukraina e ka nisur “ofensivën e shkallës së gjerë” në rajonin e Donjeckut, duke i përdorur gjashtë batalione të mekanizuara dhe dy batalione tankesh.

Ajo ka pretenduar se ukrainasit kanë tentuar të depërtojnë në mbrojtjen ruse, por se, sipas ministrisë, “nuk ka pasur sukses”.

Moska ka pretenduar se Ukraina i ka humbur 250 trupa ushtarake dhe 16 tanke.

Ukraina është duke u përgatitur që disa muaj për kundërofensivë.

Mirëpo, ajo ka kërkuar sa më shumë kohë që mundet për t’i trajnuar ushtarët dhe për të marrë ndihmën e ofruar nga aleatët perëndimorë.

Zyrtarët në Kiev kanë paralajmëruar kundër spekulimeve publike për ofensivën, duke thënë se diçka e tillë do t’i ndihmojë armikut.

Rusia nisi operacionin e saj ushtarak në shkurt 2022. Ushtria e Kievit tha kohët e fundit se nuk do të kishte njoftim për fillimin e manovrave.

Ministria ruse e Mbrojtjes raportoi se dje, në jug të Donetsk, “Armiku ka nisur një ofensivë në shkallë të gjerë në pesë sektorë të ballit.

Nga ana tjetër, NATO njoftoi se bisedimet për pranimin e Suedisë në Aleancën Atlantike do të fillojnë më 12 qershor.

Si rezultat i bombardimeve ruse në rajonin e Kharkiv, dy civilë u vranë dhe tre të tjerë u plagosën.

Ndërkaq, presidenti ukrainas Zelensky denoncoi: ” Moska arrin të anashkalojë sanksionet ndërkombëtare”.