Presidentja e Kosovës, Vjosa Osmani i kërkoi Ministrisë së Punëve të Jashtme, shpalljen “non grata” të dy zyrtarëve rusë. Ata kanë punuar në Zyrën Ndërlidhëse të Federatës Ruse në Kosovë, e dyshimet janë se aktiviteti i tyre “ka cenuar sigurinë kombëtare dhe rendin kushtetues të Republikës së Kosovës.
Në anën tjetër MPJD-ja ka nxjerrë vendimin për shpalljen e këtyre dy zyrtarëve rusë persona të padëshirueshëm dhe në të njëjtën kohën i ka njoftuar institucionet ligjzbatuese dhe autoritetet përkatëse për zbatimin e tij.
Në lidhje me këtë vendim të Kosovës, ka reaguar dhe Rusia nëpërmjet zëdhënëses së Ministrisë së Punëve të Jashtme, Marija Zakharova. Ajo e quajti “provokim të qëllimshëm” këtë vendim, dhe në favor të, siç shtoi, projektit perëndimor të Qeverisë së Kosovës, “e cila po ndjek një politikë agresive të drejtuar kundër Rusisë dhe rolit të saj konstruktiv në Ballkan.
“I bëjmë thirrje UNMIK-ut dhe forcave ndërkombëtare në Kosovë, në kuadër të kompetencave të tyre në përputhje me Rezolutën 1244 të Këshillit të Sigurimit të OKB-së, të garantojnë sigurinë dhe kushtet e nevojshme për punën normale të personelit të zyrës ruse në Prishtinë. Ne presim garanci të duhura me shkrim nga administrata e OKB-së”, shprehet Zakarova.
Sipas Zakharovës, zyrtarët e shpallur non grata janë të akredituar nga UNMIK-u.
