Ministria ruse e Mbrojtjes njoftoi ditën e sotme tërheqjen nga ishulli i Gjarprit, një territor i Ukrainës në Detin e Zi. Rusia e kishte përdorur ishullin pranë qytetit-port të Odesës, si bazë operacionet e saj, pasi e pushtoi atë në fazat e hershme të agresionit. Forcat ukrainase i kanë goditur vazhdimisht forcat ruse në këtë ishull.
Rusia këmbëngul se tërheqja ishte një gjest i vullnetit të mirë për të mos penguar, siç tha, përpjekjet e OKB-së për të krijuar një korridor për eksportimin e drithërave ukrainase.
Shefi i kabinetit të Presidentit ukrainas Volodymyr Zelenskiy, Andriy Yermak, konfirmoi tërheqjen e forcave ruse nga ishulli.
Në një postim në rrjetin social Twitter ai shkruante se Forcat e Armatosura të Ukrainës bënë një punë të shkëlqyer.
Gjithashtu, po ditën e sotme, Britania njoftoi një ndihmë të re prej një miliard dollarësh për Kievin.
Zyra e kryeministrit Boris Johnson tha se paratë do të shkojnë për sigurimin e sistemeve të mbrojtjes ajrore, mjeteve ajrore pa ekuipazh, si dhe pajisje jetike për trupat ukrainase. Presidenti ukrainas Volodymyr Zelensky u shpreh mirënjohës për ndihmën në fushën e sigurisë dhe e quajti Britaninë një mik të vërtetë e partner strategjik.
Discussion about this post