Një investigim i emisionit “STOP” ka nxjerrë në dritë një skandal korrupsioni në Kadastrën e Durrësit, ku një sekser i dyshuar, Durim Muça, kërkonte ryshfet për të përshpejtuar shërbimet. Ky rast ka ngritur dyshime të forta mbi efektivitetin e reformës së digjitalizimit që kryeministri Edi Rama e kishte cilësuar si “revolucion” për të luftuar korrupsionin.
Dy vite më parë, në një deklaratë të fortë, kryeministri Rama premtoi se Kadastra do të ishte plotësisht digjitale, duke i dhënë fund korrupsionit dhe ndikimit njerëzor në proceset e pronësisë.
“Askush brenda në Kadastër nuk do të mundet të përgjigjet edhe sikur të dojë, asnjë nga kushërinjtë që keni futur në Kadastër… asnjë nga ata që gjasme ka dhënë jetën për PS-në nuk do të ketë më gjë në dorë,” deklaroi Rama. Ai theksoi se proceset do të drejtoheshin vetëm nga “makineria digjitale” dhe se qytetarët nuk do të kishin nevojë të shkonin më fizikisht në zyra, pasi gjithçka do të kryhej përmes portalit e-Albania.
Rasti i Shaban Tonuzit, i cili po sorrollatej prej dy vitesh për një shërbim bazë, ndërkohë që sekserët funksiononin lirshëm brenda institucionit, tregon se premtimet e bëra duket se kanë dështuar në zbatimin e tyre. Përgjimet e publikuara nga “STOP” tregojnë një rrjet korruptiv, ku një person i dyshuar si sekser jo vetëm kërkonte para, por premtonte se mund t’i anashkalonte procedurat falë ndikimit të “shefave”.
Ky skandal ka hedhur hije mbi efektivitetin e digjitalizimit të Kadastrës dhe ngre pyetje të rëndësishme: A ka dështuar vërtet reforma e digjitalizimit për të luftuar korrupsionin e vogël, apo thjesht ka krijuar një mekanizëm të ri për abuzim?
Discussion about this post