Sa do zgjasë kriza ekonomike? Shano: Inflacioni ka kapur majat, shqiptarët po mbijetojnë

Në një intervistë për “Fax News” ekonomisti Dritan Shano foli mbi situatën ekonomike në vend dhe çfarë pritet të ndodhë në muajt e ardhshëm.

Shano u shpreh me bindje se rritja e inflacionit do të jetë e pranishme për më shumë se një vit tjetër, dhe se kriza ekonomike nuk vjen vetëm nga agresioni në Ukrainë por është produkt i qeverive të shteteve.

Pjesë nga intervista:

Pyetje: Parashikimi i fundit i vitit, ky tetor si e gjen ekonominë e vendit tonë?

Shano: Ekonomia jonë si në shtator, tetor, edhe më tej do jetë jo produktive, që nuk e ndihmon qytetarin shqiptar të ecë para, i shërben vetëm për të mbijetur. Shqiptarët ikin nga Shqipëria se duan të jetojnë, jo të mbijetojnë. Inflacioni do vijojë të jetë i lartë, ndoshta për më shumë se një vit, është krijuar nga qeveritë, nuk është dukuri natyrore, është politikë qeveritare.

Të gjitha qeveritë e botës në deliret e tyre për të mundur një virus me mjetet e tyre burokratike kanë prodhuar një inflacion të përmasave të paimagjinueshme. Ky inflacion do jetë me ne për gjatë, është taksë që ul fuqinë blerëse. Po tentohet të mbulohet me situatën në Ukrainë, nuk është kështu, s’shërben dot si filtër atë që qeveritë bënë gjatë periudhës së pandemisë. Ky s’është parashikim, kjo do ndodhë.

Derisa teprica e parasë të shkarkohet si uji në banjo, ne do vazhdojmë me këtë inflacion dhe natyrisht Shqipëria është vend që do e ndjejë akoma më shumë. Presioni inflacionar psh në Itali, transferohet shumë kollaj te ne. Kemi dhe problemin e çmimit të energjisë elektrike.

Ne ndikohemi nga çdo politikë e mbrapshtë e Gjermanisë apo BE-së, paguajmë këtë çmim. Se sa do importojmë ne te pjesa e energjisë ende nuk e dimë, edhe tentativat në një kohë të lagësht për të rritur çmimin e energjisë, i gjej të pajustifikuara. Ato dy anije nuk mund të zëvëndësojnë TEC-in.

Ardhja e SHBA-së në bregun jonian me furnizimin me gaz të lëngshëm, është më shumë se sa garanci për sigurimin e energjisë, është gjurmë gjeo-politike e mirëpritur. Do kisha preferuar një TEC dhe jo dy anije të Gjermanisë.

Pyetje: Pse nuk funksionoi çështja e pyllit, TEC mund të vendosej me shumë më pak buxhet?

Shano: TEC-i Vlorës nuk i plotësonte kushtet teknike, tendenca në këtë vend sa herë ndërrohet pushteti është sikur zerojmë ça ka bërë paraardhësi dhe ja nisim nga e para, si “çarçaf i bardhë”. Njerëzit nuk e shohin njëri tjetrin si bashkëpunëtor, por si armik që duhet asgjësuar. Ajo që i mungon Shqipërisë në këto 32 vjet, është mungesa e besimit te njëri tjetrit, nuk ka zhvillim pa besim.