Ambasadorja e Shqipërisë në Izrael, Meri Kumbe, në një intervistë për Euroneës Albania, tha se nuk ka informacione që si pasojë e sulmit të Hamas të ketë shqiptarë të lënduar.
Referuar gjendjes në Izrael, Kumbe tha se gjendja e tensionuar në vend vijon të jetë po e njëjta siç transmetohet dhe në mediat ndërkombëtare.
Sipas saj, nuk ka asnjë raportim për asnjë shqiptar që ndodhet afër Rripit të Gazës.
Komuniteti shqiptaro-hebre i Izraelit është rreth 630 persona, sqaroi ambasadorja, ndërsa të punësuar vitet e fundit janë rreth 50 persona.
“Që të shtunën në orën 5 e gjysmë të mëngjesit me orën në Shqipëri dhe në 6 e gjysmë të mëngjesit me orën në Izrael kemi qenë në krye të detyrës duke i asistuar për të gjitha nevojat e tyre shqiptarët në Izrael, duke i bërë thirrje të ruajnë qetësinë, të zbatojnë protokollet e sigurisë sipas udhëzimeve të autoriteteve vendore këtu dhe mbi të gjitha ka nisur procesi që atë ditë.
I këshilluam të mos dalin nga aeroporti Ben Gurion, por të kërkonin bileta të tjera kthimi. Kanë qenë mënyra të ndryshme të kthimit të shqiptarëve në atdhe dhe këtu flasim për shqiptarë turistë të cilët u gjendën në Izrael për arsye pushimesh”, u shpreh Kumbe. Ajo shtoi se prioritetin e kanë pasur te fëmijët që kanë qenë pa prindërit atje për arsye studimi.
Ambasadorja tha se nuk janë ende në proces evakuimi sepse situata s’është e tillë, por asistenca është e vazhdueshme.
Discussion about this post