Martin Bardhi, 59 vjeç, u ekzekutua sot me armë zjarri në qendër të qytetit të Rrëshenit. Si pasojë e breshëri të automatikut kanë mbetur të plagosur edhe 3 persona të tjerë, që sipas policisë ndodheshin pranë vendit të ngjarjes.
Martin Bardhi, referuar deklaratave të Policisë, është qëlluar në lokalin e tij, nga të paktën dy persona, që janë larguar me shpejtësi nga vendi i krimit me një automjet tip Jeep, që u gjet duke u djegur rreth 12 km më larg.
Policia ka përqëndruar hetimet në pistën e hakmarrjes, referuar përplasjeve që fisi i viktimës ka pasur me një tjetër fis, atë Reçi. Pak muaj më parë, martin Bardhi dhe djali i tij kanë tentuar të vrasin me armë zjarri Saimir Reçin, nipin e Kastriot Reçit. Ndaj automjetit që lëvizte Saimir Reçi është qëlluar me pistoletë, por objektivi shpëtoi për shkak se automjetin e kishte të blinduar. Policia arrestoi Martin Bardhin në atë kohë, ndërsa shpalli në kërkim djalin e tij, por pak muaj më pas viktima e sotme u lirua dhe u la me detyrim paraqitjeje.
Ngjarja e sotme në Rrëshen duket se ka kthyer atë që konsiderohet si saga e vrasjeve në këtë qytet, por që ka kaluar edhe kufinjtë e vendit, si pasojë e përplasjeve mes fiseve.
Saga e vrasjeve
Në dhjetor 2020 është ekzekutuar Anton Keli . Ai punonte si taksist në qytet, ndërkohë që është djali i hallës së vëllezërve Gjini, disa prej të cilëve të vrarë me armë zjarri.
Dyshimet në atë kohë lidhur me vrasjen u përqëndruan në hasmërinë mes familjeve Reçi dhe Gjini në zonën e Rrëshenit.
Më shtator të 2020, në Tiranë iu bë atentat Preng Gjinit, makina e të cilit shpërtheu në një nga rrugët më të ngarkuara në zonën e Komunës së Parisit. Ai mbeti i plagosur rëndë.
Më 7 janar të 2020, u ekzekutua në mënyrë mafioze Kastriot Reçi. Ai ishte viktima e pestë në tri vitet e fundit në Rrëshen. Në vitin 2017, Reçit i vranë vëllanë, në mes të Romës në Itali.
Në prill të atij viti, Gaspër Reçi, 43 vjeç, i cili jetonte prej vitesh në Romë, u vra nga 4 të shtëna me pistoletë, nga një distancë e afërt. Dy plumba e goditën në këmbë dhe dy në kokë, duke i marrë jetën në vendin e ngjarjes.
Ngjarja e ndodhur në zonën “Tor Vergata” të kryeqytetit italian dyshohej si një vrasje e mirorganizuar dhe e studiuar më parë nga autorët.
Viktima, para se të qëllohej për vdekje, ka qenë duke lëvizur në këmbë drejt shtëpisë së tij, ndërsa një automjet tip “Smart” e ka ndjekur pas deri pranë banesës. Makina i është afruar dhe autorët e kanë thirrur para se ta qëllonin.
Në momentin që Gaspër Reçi ka ndaluar dhe është kthyer përballë personave që ndodheshin në “Smart”, është qëlluar me armë zjarri. Ai ka mbetur i vdekur në vend, ndërsa makina është larguar me shpejtësi nga vendi i ngjarjes.
Ka qenë vajza e viktimës që ka lajmëruar Policinë, pasi ka dëgjuar të shtënat kur po priste të atin që të kthehej në shtëpi. Vrasja e Gaspër Reçit në Itali iu bashkua dosjeve të Policisë shqiptare, pasi u dyshua se kishte lidhje me ngjarje që kishin ndodhur më parë në Shqipëri.
Pak më vonë, më 6 shtator të po atij viti, vritet 31-vjeçari Kreshnik Gjini në komunën e Forestit të Belgjikës. Gjini ishte nipi i Sajmir Jakut dhe u dyshua se ishte vrarë në shenjë hakmarrje për ekzekutimin e Gaspër Reçit në Romë. Në lidhje me tri ngjarjet, mësohet se Sektori i Krimeve të Rënda në Policinë e Shtetit ka shkëmbyer informacione e prova me Policinë belge dhe atë italiane.
Gjithashtu Sajmir Jaku është ekzekutuar më 9 shtator 2016. Dyshohet se dy persona të armatosur kanë qëlluar për vdekje zyrtarin, ndërsa nga të shtënat me armë edhe një person tjetër mbeti i plagosur. Policia ka thënë se Sajmir Jaku është qëlluar me kallashnikov kur ka qenë duke pirë kafe në një nga lokalet e zonës më të frekuentuar të qytetit të Rrëshenit me një shok.
Policia shqiptare u përfshi në hetimet për vrasjen e 31-vjeçarit Kreshnik Gjini, i cili u ekzekutua më 6 shtator 2017 në Belgjikë. Ka qenë Policia belge ajo që ka kërkuar ndihmën e Policisë shqiptare për hetimin e ngjarjes, e cila dukej se kishte lidhje me një serial vrasjesh e hakmarrjesh të ndodhura edhe në vendin tonë.
Më 13 gusht të vitit 2019 u ekzekutua në qendër të qytetit të Rrëshenit, në sy të dy fëmijëve, Armando Gjini, i njohur edhe me emrin Tonin Gjini. Shkak për këtë ngjarje, sipas Policisë dyshohej e kaluara e tij në Belgjikë. Gjini u qëllua disa herë me pistoletë, ndërsa ndodhej brenda automjetit të tij përballë katedrales. 48- vjeçari dyshohet që të jetë vrarë për shkak të prishjes së pazareve të drogës.
Discussion about this post