Saida Dollani do të jetë zëvendëskryetarja e re e Gjykatës së Posaçme të Apelit për Korrupsionin dhe Krimin e Organizuar. Ajo ka marrë detyrën në përfundim të mandatit 3 vjeçar të Nertina Kosovës e cila e ushtroi këtë detyrë nga 23 dhjetori i vitit 2019 deri në 23 dhjetor të këtij viti.
Aktualisht Dollani ushtron detyrën e gjyqtares së Gjykatës së Apelit të Tiranës që nga 5 Prilli i 2004-ës. Ndërsa me vendimin e fundit, ajo do të mbajë postin e zëvendës kryetares së Apelit të GJKKO-së për tre vitet e ardhshme.
Njoftimi:
Mbledhja e Gjyqtarëve të Gjykatës së Posaçme të Apelit për Korrupsionin dhe Krimin e Organizuar, e mbajtur nën drejtimin e zëvendëskryetares së Gjykatës, Nertina Kosova më datë 23.12.2022, zgjodhi zëvendëskryetaren e Gjykatës së Posaçme të Apelit për Korrupsionin dhe Krimin e Organizuar Saida Dollani.
Gjyqtare Saida Dollani, merr detyrën në përfundim të mandatit të zëvendëskryetares Nertina Kosova, e cila ushtroi detyrën e zëvendëskryetares së Gjykatës së Posaçme të Apelit për Korrupsionin dhe Krimin e Organizuar, me kompetencat e Kryetarit të Gjykatës nga data 23.12.2019 deri më datë 23.12.2022.
Magjistrate Saida Dollani ushtron funksionin e gjyqtares së gjykatës së apelit që nga data 05.04.2004, fillimisht si gjyqtare në Gjykatën e Apelit për Krime të Rënda (05.04.2004-19.12.2019) dhe nga 19.12.2019 dhe në vazhdim në Gjykatën e Posaçme të Apelit Për Korrupsionin dhe krimin e Organizuar.
Sipas procedurës së diktuar nga ligji nr. 98/2016, “Për Organizimin e Pushtetit Gjyqësor në Republikën e Shqipërisë”, si dhe të Vendimit nr. 7, datë 21.12.2018 “Rregullore për miratimin e rregullave për zgjedhjen e zëvendëskryetarëve të gjykatave” të Këshillit të Lartë Gjyqësor.
Discussion about this post