Saimir Tahiri lë burgun, zbulohen arsyet që bindën Gjykatën të lirojë ish-ministrin

Ish-ministri i Brendshëm, Saimir Tahiri është liruar nga qelia pas më shumë se 1 viti në burg.

Për ish-ministrin janë dy ekspertiza mjeko-ligjore, që arsyetojnë se përse si nuk mund të qëndrojë në burg për pjesën e mbetur të dënimit.

Në njërën prej tyre, thuhet se Tahiri ka probleme shëndetësore.

Ndërsa në akt ekspertizën e dytë, shpjegohet se bashkëshortja e ish-ministrit nuk është në gjendje të mirë shëndetësore dhe për pasojë, nuk ka kush të kujdeset për fëmijët. Kërkesa, që është bërë gjashtë muaj më parë në Gjykatën e Elbasanit, u pranua këtë të premte.

Tahiri u dënua me 3 vjet e katër muaj burg për akuzën e shpërdorimit të detyrës, mbasi gjatë kohës në krye të dikasterit të rendit Habilajt kultivuan kanabis sativa.

Lirimi i tij nga qelia u vendos sot nga gjyqtarja e Gjykatës së Elbasanit, Matilda Fetahu.

Pjesën e mbetur të dënimit, rreth 1 vit e 7 muaj, ai do e kryejë në shtëpi.

Saimir Tahiri u dënua nga GJKKO me 5 vite burg për shpërdorim detyre, por për shkak të gjykimit të shkurtuar konvertohet në 3 vite e 4 muaj burg.

Dhe në datën 4 shkurt 2022, Apeli i GJKKO la në fuqi këë vendim, duke çuar në qeli ish-ministrin.

Togat e zeza përcaktuan se ai do vuante dënimin në një burg të sigurisë së zakonshme.

Ai u dërgua në burgun e Fierit, por më pas u transferua në atë të Lushnjes, pas një kërkese të familjarëve të tij.