Kryetarja e Bashkisë Durrës, Emiriana Sako, ka firmosur kontrata në kundërshtim të plotë me ligjin. Duke xhiruar 65 milionë lekë në xhepat e të privilegjuarve. Faktet e publikuara deri më sot kanë treguar që tenderët që regjistron Sako në APP, pak ditë më vonë listohen tek prokurimet me “Rad Flag” ose denoncohen në Komisionin e Prokurimeve Publike për abuzime dhe vjedhjet që bëhen. Këtë radhë, 2 tenderët kanë marrë “Flamurin e Kuq” si kambanë alarmi për abuzimet që bën Sako me prokurimet dhe paratë që përvetësohen përmes këtyre proceseve.
Tenderi i parë ka si objekt “Blerje Gomash” për Ndërmarrjen e Shërbimeve Komunale në Durrës. Kontrata është firmosur me datë 15 shkurt 2023. Por, kjo firmë është hedhur pa respektuar pikat kryesore në ligjin “Për Prokurimet Publike”. Fituesi është kompania “Sparkle 32” sh.p.k. cila ka marrë kontratën pa garë. Sako i eliminoi kompanitë e tjera që në fazën e parë dhe mbeti e vlefshme vetëm oferta e Eximoil sh.a.. Kështu pa konkurrim dhe pa lodhje, kjo firmë nënshkroi kontratën me Sakon, e cila i xhiroi 63 milionë lekë për të blerë goma të reja.
Ndërkohë në dokumente bie në sy se oferta e fituesit është në vlerën 56 milionë lekë, ndërsa oferta tjetër ishte në vlerat 49 milionë lekë. Pra, 7 milionë lekë më lirë dhe as nuk janë marrë fare në konsideratë. Në fakt ligji kërkon që të merren në shqyrtim si prioritet ofertat më të lira.
Kështu, me 63 milionë lekë Sako do të blejë 124 goma, që sipas përllogaritjeve i bie të ndërrohen gomat për 31 automjete. Rrjedhimisht do të shpenzohen mbi 1 milion lekë për gomat e 1 automjeti. Edhe sikur të ishin porositur goma të blinduara nuk do të kushtonin kaq shumë!
29 milionë lekë për vaj lubrifikant
Po në të njëjtën ditë, Emiriana Sako ka firmosur edhe një tjetër tender abuziv. Bëhet fjalë për prokurimin me objekt “Blerje Vajra Lubrifikante”, për të cilin do të shpenzojë 29 milionë lekë. Këtë tender e ka fituar firma “Eximoil” sh.a. me ofertë 26 milionë lekë. Ndërsa firma tjetër është skualifikuar në fazën e parë me argumentin se ka pasaktësi në dokumentet. Por, duke mbetur e vetme në garë “Eximoil” sh.a. ka nënshkruar kontratën pa konkurrencë. Me pak fjalë i është falur fitorja në tavolinë nga Sako.
Sakaq, ajo që bie në sy në këtë dokument është oferta e firmës së skualifikuar Kappa-Oil sh.a. Ajo ka ofruar të bëjë të furnizim me një fond 13 milionë lekë. Pra 13 milionë lekë më lirë se oferta fituese. Madje në dokumentet e kompanisë shpjegohet qartë që ky shërbim mund të realizohet edhe me këtë vlerë. Këtë mundësi, edhe autoriteti kontraktor nuk e ka përjashtuar. Ama duke anashkaluar ligjin nuk e ka marrë parasysh, pasi është e qartë që fituesi ishte i paracaktuar. Është e qartë se Sako po përvetëson në bashkëpunim me kompaninë sepse nuk mundet ta fitojë tenderin kompania me ofertën dyfish më të shtrenjtë.
Kështu në një ditë Sako firmosur dy tenderë pa konkurrencë dhe me oferta më të shtrenjta, duke vënë në rrezik fondet e bashkisë për rrota e vaj makinash.
Lexo edhe: Veliaj dhe Sako i japin 250 mijë euro Zotos për Shën Valentin
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post