Ku shfaqet Kastrati, ndodhin afera dhe tenderë pa garë me fondet e buxhetit të shtetit. Nuk pritej të ndodhte ndryshe me dy tenderët e fundit të Bashkisë Durrës. Kryetarja Emiriana Sako ka firmosur dy kontrata ditën e djeshme në favor të Shefqet Kastratit, të cilat kapin vlerën 2 miliardë lekë.
Njëri nga prokurimet ka si objekt blerjen e naftës. Për të siguruara naftë për makinat e Ndërmarrjes së Shërbimeve Komunale në Durrës, Sako do të shpenzojë 197 milionë lekë për të vlerë 1 mijë tonë naftë. Në kontratë thuhet se ky furnizim do të mjaftojë për një vit, por në fakt kaq shumë litra do të mjaftonin për të gjitha institucionet në Durrës dhe jo vetëm për ato në varësi të bashkisë. Vlen të kujtojmë se tenderët e Sakos për karburante janë shpeshtuar, madje edhe në kohën kur çmimet e naftës dhe benzinës thyenin rekorde.
Nga ana tjetër shohim se, përveç faktit që Sako po abuzon me karburantin, ajo po ia blen “Kastratit” sipas rregullave të tij. Pra, lidhet kontratat kur do Çeti, blihet aq karburant sa do Çeti, shitet me çmimin që përcakton Çeti! Këtë gjë e tregon edhe fakti që ky tender është dhënë pa garë dhe fondi limit është aq sa ka paraqitur ofertën firma “Kastrati” shpk. Kjo kompani ka qenë e vetmja në “garë” me ofertën 197 906 500,00, lekë, fiks sa është edhe fondi limit! Ky fakt përben një tjetër shkelje dhe tregon se kemi të bëjmë me fitues të paracaktuar.
10 milionë lekë benzinë
Ka punonjës të Sakos që e furnizojnë makinën me benzinë dhe kryebashkiakia ka menduar për të gjithë. Kështu, ajo ka firmosur me 3 shkurt 2023 edhe një tjetër kontratë me Kastratin, përmes të cilës do të blejë 13 mijë litra benzinë. Edhe këtë tender Shefqet Kastrati e ka marrë pa garë. Serish ai ka qenë i vetmi ofertues dhe ka përcaktuar vlerën që do të ketë tenderi. Ndërsa në dokumente shihet se paraqitja e fundit e ofertave ka qenë me datë 1 shkurt 2023, ku është mbajtur dhe vlerësimi nga komisioni. Pa e zgjatur më shumë me data 3 shkurt 2023, Sako ka shpallur fitues Kastratin.
Ndërkohë vihet re se “Kastrati” ka marrë vetëm për muajin e parë të vitit 2023 mbi 1 miliardë lekë nga Emiriana Sako dhe Erion Veliaj. Siç dihet, Shefqet Kastrati ka krijuar monopol në tregun e karburanteve në vend dhe është aktori kryesor që përfiton nga vendimet e Bordit të Transparencës.
Lexo edhe: Emiriana Sako nis vitin me Kastratin, i fal 1.3 mld lekë, fitues i paracaktuar
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post