Kryetarja e Bashkisë Durrës, Emirana Sako, nuk lë rast pa përfituar të bëjë tendera abuzivë, madje edhe kur fondet janë për kulturën. Sepse Durrësi është qytet që ka trashëguar infrastrukturë për aktivitete artistike dhe kulturore, por gjenden të lëna pas dore, derisa shkojnë drejt rrënimit.
Në ato raste ndërhyn bashkia për investim dhe organizohen prokurime që janë centralizuar në duart e kryetares.
Tenderi i fundit është me objekt ‘Rikonstruksion Galeria Nikolet Vasia’, e cila ndodhet ne qendër të Durrësit, shumë pranë bashkisë. Një ndër galeritë më te vjetra publike të qytetit, ku janë zhvilluar shumë aktivitete kulturore dhe është e vlerësuar nga artdashësit vendas dhe të huaj.
Prokurimi ka në dispozicion 100 milionë lekë, një vlerë e konsiderueshme por varet se si do të përdoret.
Sipas projektit do të bëhen vetëm risuvatime në disa pjesë, vendosje dyersh të reja dhe lyerje e godinës njëkatëshe.
Punimet do të zgjasin vetëm 49 ditë dhe kështu interesi për këtë mundësi fitimprurëse ka qenë i lartë. Janë 9 kompani kanë dorëzuar ofertat e tyre, por 8 prej kompanive u skualifikuan që në fillim. Ato kishin edhe propozimet më ekonomike. Siç ndodh rëndomë, përjashtimi i tyre ka ardhur me arsyetimet se nuk kanë dorëzuar dokumente për punë të mëparshme, për deklarim punëtorësh, apo vërtetimin të pagesave të tarifave vendore. Nëse qëllimi do të ishte të kursehej fondi dhe të garantohej cilësia e punimeve, do të komunikohej me pjesëmarrësit dhe nëse ishte e mundur do të plotësoheshin dokumentet e munguara.
Në fakt vjen menjëherë përjashtimi sepse fituesi është i paracaktuar.
Sako nuk e ka zbatuar ligjin, por ka favorizuar firmën “T&XH” me pronar Përparimin Cenën, që propozonte ta kryente punën me 92 milionë lekë. Ofertat e tjera varionin rreth shumës 83 milionë lekë, pra të paktën 20 milionë lekë do të ishin kursyer nga fondi limit.
Ndërsa kryetarja Sako ia ka dhuruar kontratën pa garë firmës
“T&XH”, Open Data Albania i ka vendosur tenderit “Flamurin e Kuq”, që është shenja e riskut të korrupsionit.
Nga a ana tjetër, edhe organet e drejtësisë kanë vëmendje të shtuar kohët e fundit mbi denoncimet për korrupsion me kontratat e punëve publike në Bashkinë Durrës. Kujtojmë se në 17 maj 2024, kryetarja Sako u paraqit në SPAK.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post