Ish-deputeti i PD, Ervin Salianji, ka reaguar pas mos ekzekutimit të Himnit Kombëtar Shqiptar në aktivitetin e zhvilluar në Pustec, ku u luajt vetëm himni maqedonas.
Përmes një postimi në rrjetet sociale, Salianji e ka cilësuar situatën si “të papranueshme, fyese dhe skandaloze”, duke kritikuar Bashkinë e Pustecit dhe institucionet përgjegjëse.
Ai thekson se Pusteci është pjesë e territorit të Republikës së Shqipërisë dhe se respektimi i minoriteteve duhet të shoqërohet me respektimin e simboleve kombëtare dhe institucioneve shqiptare.
“E papranueshme, fyese dhe skandaloze që Himni Kombëtar nuk respektohet në Pustec nga Bashkia dhe institucionet! Pusteci është shtëpi e qytetarëve shqiptarë, pavarësisht përkatësisë së tyre etnike.
Respekti për minoritetet është detyrim i shtetit shqiptar, por respekti për shtetin, simbolet kombëtare dhe institucionet e tij është detyrim i çdo qytetari dhe çdo institucioni vendor.
Të mos vendosësh Himnin Kombëtar Shqiptar në një aktivitet zyrtar në territorin e Republikës së Shqipërisë është e papranueshme dhe fyese”, shkruan Salianji.
Ai theksoi se “shteti nuk negociohet dhe simbolet nuk nëpërkëmben”.
“Shteti nuk negociohet dhe simbolet nuk nëpërkëmben. Të drejtat e minoriteteve janë të garantuara por nuk ka asnjë justifikim për të mos respektuar Republikën e Shqipërisë dhe simbolet e saj”, mbyll postimin e tij Ervin Salianji.
Discussion about this post