Deputeti i Partisë Demokratike Ervin Salianji ka bërë një deklaratë të papritur në Kuvend, ku ka thënë se persona të kërkuar nga Spanja të akuzuar apo të dënuar për krime, punojnë në fushatat zgjedhore për PS. Sipas Salianjit, personat për të cilët ka një kërkesë për ekstradim, u bëhet presion që të punojnë për PS në zgjedhjet lokale të 6 marsit.
“Ne ekspertojmë krim në Evropë dhe e mbrojmë. Ka pas 25 kërkesa tha ministri i Drejtësisë nga Spanja për ekstradim, pra njerëz që rrinë e jetojnë këtu një pjesë i përdorni për fushatë, duke ua çuar kërkesat e ekstradimit, por i thoni nuk iu ekstradojmë vetëm punoni për PS, është taktikë e përdorur kudo e përdorët njësoj në këto zgjedhjet e pjesshme të 6 marsit”, tha Salianji.
Ndër të tjera, Salianji u shpreh se prej tre javësh, kryeministri Rama struket e nuk vjen në seancë, pasi çështja që trajtohet është afera korruptive e inceneratorëve, për të cilën opozita e akuzon si fajtorin kryesor.
“Një teatër tjetër i shëmtuar për të shmangur vëmendjen nga afera më e madhe e qeverisë shqiptare, e cila ka detyruar Ramën që të struket dhe të mos vijë në parlament. Ka tre javë që nuk vjen në parlament sepse, në tre javë diskutimi kryesor, çështja kryesore, është afera korruptive e inceneratorëve. Mos harrojmë se Rama dhe ky grup e hapën fushatën për t’i vendosur gjoksin aferës së inceneratorëve në Elbasan. Kjo ishte nisja e fushatës së PS, jo vetëm për të treguar se Rama i dilte për zot kësaj pune, por për të përfshirë të gjithë grupin e PS dhe të gjithë zyrtarët e PS dhe për të intimiduar drejtësinë dhe për të treguar se ky është ai që është vendimmarrësi në këtë aferë. Nuk ka njeri tjetër veç Ramës, që mund të bëjë bashkë 4 ministra. 3-4 bashki për të vendosur në dispozicion të vetes më shume se 430 mln euro, që shpërndahen për të blerë e vjedhur zgjedhjet”, tha Salianji.
Discussion about this post