Deputeti i Partisë Demokratike, Ervin Salianji ka vendosur në fokus punësimet në periudhat elektorale, për të cilat ka bërë dhe një reagim në rrjetin social “Facebook”. Sipas demokratit, punësimet në administratën publike janë dyfishuar nga 85 mijë në vitin 2014, në 182 mijë në vitin 2020. Administrata Publike është dyfishuar si pasojë e punësimeve partiake dhe elektorale
MË tej, Salianji ka bërë publike dhe shifrat të cilat lidhen me këtë fenomen të “Rilindjes”.
Në vitin 2014 janë shpenzuar 375 milionë Euro për “paga bazë”, vlerë e cila është dyfishuar në 620 milionë Euro në vitin 2020. Fatura në buxhetin e shtetit për “paga bazë” në periudhën 2014 – 2020 është 4 miliardë Euro.
Në tremujorin e fundit të 2020 janë punësuar në administratën publike 10.572 persona, duke rritur punësimin në sektorin publik me 6% dhe duke shënuar rekord në 30 vitet e fundit.
Në kundërshtim me Vendimin nr. 9, datë 24.12.2020, “Për rregullat për raportimin e veprimtarive me karakter publik të institucioneve publike, agjencive dhe/ose ndërmarrjeve shtetërore, kategoritë e veprimtarive të ndaluara, si dhe monitorimin e veprimtarisë, sjelljes dhe përdorimit të burimeve njerëzore, financiare dhe logjistike të administratës shtetërore para zgjedhjeve” të Komisionit Qendror të Zgjedhjeve, më datë 20.01.2021 në Fletore Zyrtare, u publikua VKM-ja Nr. 1151, datë 24.12.2020 “Për përcaktimin e numrit të punonjësve me kontratë të përkohshme, për vitin 2021, në Njësitë e Qeverisjes Qendrore”. Nëpërmjet kësaj VKM-je, janë shtuar për efekte elektorale 2,472 pozicione me kontrata të përkohshme pune në njësi të qeverisjes qendrore, kryesisht sanitare dhe specialist, pra, pozicione pune për blerje vote.
Sipas të dhënae zyrtare dhe publike të Ministrisë së Financave, për periudhën janar – prill 2014, shpenzimet për “paga bazë” llogariten në 40 milionë Euro, ndërsa për të njëjtën periudhë të vitit 2021, fatura financiare llogaritet në 224 milionë Euro, pra një diferencë prej 184 milionë Euro.
Nga të njëjtat të dhëna zyrtare dhe publike, për periudhën janar – prill 2021, fatura financiare e punësimeve në administratën publike është 224 milionë Euro, nga 204 milionë Euro për të njëjtën periudhë të vitit 2020, duke shënuar një rritje me 20 milionë Euro.
“Në Thesarin e Shtetit nuk përfshihen të dhënat për punësimet në 258 institucione publike të organizuara në formën e shoqërive tregtare, fatura financiare e punësimeve të së cilave gjatë periudhës janar – prill 2021 është më shumë se 43 milionë Euro, shkruan Salianji.
