Ish-deputeti i PD, Ervin Salianji ka reaguar pas vendimit të Dhomave të Specilizuara të Hagës për katër ish-krerët e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Në një reagim në rrjetet sociale, Salianji tha se vendimi prek kujtesën, sakrificat dhe betejën për lirinë e Kosovës.
Ai theksoi se asnjë vendim gjykate nuk mund të ndryshojë historinë apo të zhbëjë sakrificat e bëra gjatë luftës.
“Mund të shkruhen faqe të tëra në dosje dhe të shpallen vendime. Por asnjë gjykim nuk mund të fshijë historinë, të zhbëjë sakrificën apo të zbehë të drejtën e Kosovës për liri”, thuhet ne reagimin e Salianjit.
Reagimi i Salianjit:
Vendimi i sotëm nuk sjell vetëm dhimbje, por prek kujtesën, betejën për liri, sakrificat dhe dinjitetin e një kombi.
Pas emrave të Thaçit, Veselit, Selimit e Krasniqit qëndrojnë vite përballjeje, humbjesh e sakrifice, në emër të së drejtës së një populli për të jetuar i lirë në tokën e vet.
Mund të shkruhen faqe të tëra në dosje dhe të shpallen vendime. Por asnjë gjykim nuk mund të fshijë historinë, të zhbëjë sakrificën apo të zbehë të drejtën e Kosovës për liri.
Sot, më shumë se kurrë, shqiptarët janë bashkë. Nga Kosova në Shqipëri, nga Presheva në Tetovë e në çdo cep ku rreh zemër shqiptare, zëri është një: lufta çlirimtare ishte e drejtë!
Shqiptarët, me dinjitet dhe kokën lart.
Discussion about this post