Deputeti i Partisë Demokratike, Ervin Salianji ka qenë këtë fundjavë me qytetarët e Korçës për të prezantuar programin e opozitës për uljen e TVSH-së për produktet e shportës nga 20% në 6%.
Salianji shkruan në Facebook, se produktet e konsumit bazë si vaji, sheqeri, mielli, orizi, makaronat, kripa, kosi, qumështi, buka dhe uji, do të shiten me çmime më të lira si pasojë e uljes së TVSH-së.
Ndër të tjera, deputeti i Korçës shprehet se ky do të jetë propozimi që do mbrojnë më fort në Kuvend pasi ndikon drejtpërdrejtë në ekonomitë e qytetarëve.
Edhe ditën e djeshme, Salianji zhvilloi një takim në Korçë, ku në emër të PD i propozoi qytetarëve që të ngrenë zërin për të ulur vlerën TVSH në 6%, sepse në këtë mënyrë do të rikthehet ulja e çmimit për bukën, perimet dhe karburantin.
Kujtojmë se, pak javë më parë çmimi i bukës në vend u rrit me 10 lekë dhe pavarësisht se u konstatua se përgjegjëse për këtë janë kompanitë e prodhimit të miellit, Autoriteti i Konkurrencës nuk mori asnjë masë ndaj pesë oligarkëve.
